Jump to content

မၢၵ်ႇလူင်ဢီႇရၢၼ်း တိူဝ်ႉၺႃးႁူင်းယႃ ဢိတ်ႇသရေး

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းၽတ်း၊ ၸုၼ်ႇ 19၊ 2025

ဢီႇရၢၼ်း ယိုဝ်းမၢၵ်ႇလူင်သေ လႆႈတိူဝ်ႉၺႃး ႁူင်းယႃ တီႈဝဵင်း Beersheba မိူင်းဢိတ်ႇသရေး သေ ပၢင်တိုၵ်း ၼႂ်းၵႄႈသွင်မိူင်း သိုပ်ႇပဵၼ်မႃး တေႃႇထိုင် ဝၼ်းတီႈ 7 ယူႇ။

ဢီႇရၢၼ်းတႄႉ လၢတ်ႈဝႃႈ ၶဝ်ယိူင်းဢၢၼ်းယိုဝ်း ဢွင်ႈတီႈသိုၵ်း ဢၼ်မီးႁိမ်းႁူင်းယႃၵူၺ်း ဢမ်ႇယိူင်းယိုဝ်းႁူင်းယႃၼႆယဝ်ႉ။ ၶၢဝ်းပၢင်တိုၵ်း ၼႂ်းၵႄႈသွင်မိူင်းၼႆႉ ၽၢႆႇပၢႆးယူႇလီ ဢိတ်ႇသရေးၶဝ် လၢတ်ႈဝႃႈ ၵူၼ်းမၢတ်ႇၸဵပ်းၶဝ် မီး 271 ၵေႃႉၼႆယဝ်ႉ။

ဝၢႆးသေ ၵႂႃႇလႄႇ ႁူင်းယႃ Soroka မိူဝ်ႈဝၼ်းၽတ်းၼၼ်ႉယဝ်ႉ ၽွင်းလူင်ၽၢႆႇၵႅတ်ႇၶႄ ဢိတ်ႇသရေး Israel Katz လၢတ်ႈဝႃႈ ၽူႈဢွၼ်ႁူဝ်သုင်သုတ်း ဢီႇရၢၼ်းၼႆႉ “ဢမ်ႇပၼ် ႁႂ်ႈသိုပ်ႇမီးယူႇထႅင်ႈႁိုင်” ၼႆယဝ်ႉ။

ၽၢႆႇသိုၵ်းဢိတ်ႇသရေး လၢတ်ႈဝႃႈ ၶဝ်ပိုတ်းယိုဝ်း ဢွင်ႈတီႈၼိဝ်ႇၶလီးယႃးဢီႇရၢၼ်းလႄႈ ႁူင်းႁႆထၢတ်ႈၼိုင်ႈလူင် Arak လႄႈ ႁူင်းၸၢၵ်ႈ Natanz ၸိူဝ်းၵဵဝ်ႇၵပ်း ၼိဝ်ႇၶလီးယႃးၼၼ်ႉၼႆယဝ်ႉ။

ပၢင်တိုၵ်းၼႆႉ တႄႇပဵၼ်မႃး မိူဝ်ႈဝၼ်းတီႈ 13 လိူၼ်ၸူႇလၢႆႇ မိူဝ်ႈဢိတ်ႇသရေး ပိုတ်ႇၼႃႈသိုၵ်း တိုၵ်းတေႃး ဢွင်ႈတီႈ ၼိဝ်ႇၵလီးယႃး ဢီႇရၢၼ်းသေ ဢဝ်တၢႆ ၸွမ်သိုၵ်းလူင် လႄႈ ၽူႈလူင်ႉလႅၼ်ႇ ၼိဝ်ႇၵလီးယႃး လၢႆလၢႆၵေႃႉ။

ၵႅမ်ၽွင်းလူင် ၵၢၼ်ၼွၵ်ႈမိူင်း ဢိတ်ႇသရေး လၢတ်ႈဝႃႈ လွင်ႈဢၼ် ဢီႇရၢၼ်း ယိုဝ်းႁူင်းယႃ Soroka ၼၼ်ႉ ပဵၼ်လွင်ႈတင်ႈၸႂ် လႄႈ ပဵၼ်လွင်ႈပူၼ်ႉပႅၼ်မၢႆမီႈ ၼႆယဝ်ႉ။

တီႈၼႂ်းလိၵ်ႈပိုၼ်ၽၢဝ်ႇ တီႈ X ၼၼ်ႉ Sharren Haskel လၢတ်ႈဝႃႈ ၼၼ်ႉပဵၼ်ဢွင်ႈတီႈ ႁူင်းယႃပိူင်လူင် တႃႇၼႃႈလိၼ် Negev မိူင်းဢိတ်ႇသရေး တင်းမူတ်းၼၼ်ႉၼႆယဝ်ႉ။

ၸွမ်ၽွင်းလူင် ဢိတ်ႇသရေး Benjamin Netanyahu လၢတ်ႈဝႃႈ ဢိတ်ႇသရေး တေဢဝ်ၶိုၼ်းၵႃႈၶၼ်တဵမ်ထူၼ်ႈ တီႈၽူႈဢုပ်ႉပိူင်ႇ ၶုၼ်ႁၢႆႉ တီႈဝဵင်း Tehran ၼၼ်ႉ တင်းမူတ်းၼႆယဝ်ႉ။

ၽွင်းမိူဝ်ႈ ၽွင်းလူင်ၽၢႆႇၵႅတ်ႇၶႄ ဢိတ်ႇသရေး Israel Katz လၢတ်ႈတီႈၽူႈသိုဝ်ႇၶၢဝ်ႇၶဝ်ဝႃႈ "ၽူႈဢွၼ်ႁူဝ်သုင်သုတ်း ဢီႇရၢၼ်း Ayatollah Ali] Khamenei ပိုၼ်ၽၢဝ်ႇပိုတ်ႇၽုၺ်ႇဝႃႈ မၼ်းၶႂ်ႈႁႂ်ႈဢိတ်ႇသရေး လူႉလႅဝ် - မၼ်းၸင်ႇလႆႈဢဝ် သုၼ်ႇတူဝ်မၼ်း ပၼ်ၶေႃႈပူင် ႁႂ်ႈယိုဝ်းႁူင်းယႃ " ၼႆယဝ်ႉ။

ယွၼ်ႉႁွင်ႈယႃ လၢႆလၢႆဢၼ် လႆႈလူႉလႅဝ်ၵႂႃႇ ယွၼ်ႉၽႆးမႆႈ ႁူင်းယႃ ဢၼ်ၼိုင်ႈသေ ၽၵ်းတူႁူးလႅင်း လႆႈလူႉၵွႆ လႄႈ ၽႃမုင်းႁိူၼ်း လႆႈလူႉၵွႆၵႂႃႇ ၼႆ ၽူႈမီးပုၼ်ႈၽွၼ်း ႁူင်းယႃၶဝ် လၢတ်ႈၼႄၼင်ႇၼႆ။

ၵူၼ်းပဵၼ် 200 ပၢႆၼၼ်ႉ တေသူင်ႇၵႂႃႇတီႈ ႁူင်းယႃတၢင်ႇတီႈ ၼႆ ၽူဝ်ႇၾႃႇသျူဝ်ႇမီႇ ၶူဝ်ႇတိတ်ႉ ၽူႈပွင်ၵၢၼ် Soroka လၢတ်ႈၼႄၼင်ႇၼႆ။

မၼ်းသိုပ်ႇလၢတ်ႈဝႃႈ “ယၢမ်းလဵဝ် ႁဝ်းၶႃႈ ပႆႇႁူႉဝႃႈ ႁူင်းႁေႃ ဢမ်ႇၼၼ် ႁွင်ႈယႃတၢင်ႇဢၼ် ၸၢင်ႈၵူၼ်ႇပင်းၵႂႃႇႁိုဝ်” ၼႆယဝ်ႉ။

မိူဝ်ႈဝၼ်းၽတ်းၼၼ်ႉ မၢၵ်ႇၼူၾႆး ဢီႇရၢၼ်း တူၵ်းသႂ်ႇ တီႈၸႄႈဝဵင်း ရႃႇမတ်ႉၵၼ်ႇ ဢၼ်မီးၽၢႆႇဢွၵ်ႇ ဝဵင်းတႄႇလ်ဢႃႇဝီႇၼၼ်ႉ - ႁဵတ်းႁႂ်ႈ မၢၼ်ႇလူင် တူၵ်းလူင်းမႃး လၢႆလၢႆၸၼ်ႉသေ သဝ်ၾႆးၾႃႉ ပွတ်းၼိုင်ႈ တူၵ်းလူင်းၵႂႃႇ ၼိူဝ်လိၼ်။

ယွၼ်ႉမၢၵ်ႇတႅၵ်ႇ ၼႂ်းပိုၼ်ႉတီႈၼၼ်ႉ တေမီးၵူၼ်းမၢတ်ႇၸဵပ်း မွၵ်ႈ 20 ၵေႃႉ ၼႆ ၽူႈမီးပုၼ်ႈၽွၼ်းၶဝ် လၢတ်ႈၼႄၼင်ႇၼႆ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=မၢၵ်ႇလူင်ဢီႇရၢၼ်း_တိူဝ်ႉၺႃးႁူင်းယႃ_ဢိတ်ႇသရေး&oldid=12005"