Jump to content

မိူင်းၾရၢင်ႇသဵတ်ႈ တေၸႅၵ်ႇၽႄၶၢဝ်ႇငၢဝ်းၵၢၼ်ၸွပ်ႇပၼ် ယူႇၶရဵၼ်း

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းသုၵ်း၊ မၢတ်ႉၶျ် 7၊ 2025

ၸွမ်ပွင်ၸိုင်ႈ ၾရၢင်ႇသဵတ်ႈ၊ ၸွမ်ၽွင်းလူင် ဢိင်းၵလဵတ်ႈ လႄႈ ၸွမ်ပွင်ၸိုင်ႈ ယူႇၶရဵၼ်း တီႈ ပၢင်ၵုမ်လၼ်ႇတၼ်ႇ

ၽွင်းလူင်ၽၢႆႇၵႅတ်ႇၵင်ႈ မိူင်းၾရၢင်ႇသဵတ်ႈ Sebastine Lecornu လၢတ်ႈဝႃႈ မိူင်းၾရၢင်ႇသဵတ်ႈ တေၸွႆႈထႅမ် တႃႇပၼ်ၶေႃႈမုၼ်းၵၢၼ်ၸွပ်ႇ ၸူး မိူင်းယူႇၶရဵၼ်း ၼႆယဝ်ႉ။

လွင်ႈဢၼ် ၾရၢင်ႇသဵတ်ႈ ႁဵတ်းၸိူင်ႉၼႆၼႆႉ ပဵၼ်ဝၢႆးသေ ဢမႄႇရိၵၢၼ်ႇ ပိုၼ်ၽၢဝ်ႇဝႃႈ တေၵိုတ်းယိုတ်း လွင်ႈၽႄမႅင်ႇ ၶေႃႈမုၼ်း ၸွမ်း မိူင်းယူႇၶရဵၼ်း ၼႆယဝ်ႉ။

ၽူႈဢွၼ်ႁူဝ် ယူးရူပ်ႉ ပႃးၸဵမ် ၸွမ်ပွင်ၸိုင်ႈ ယူႇၶရဵၼ်း ဝေႃႇလေႃႇတီးမႃးရ် ၸႄးလႅၼ်းသၵီး ႁူပ်ႉထူပ်းၵၼ် တီႈဝဵင်း ပရူဝ်ႇသျိၼ်ႇ မိူင်းပႄႇၵျီႇယမ်ႇ မိူဝ်ႈဝႃးသေ ဢုပ်ႇဢူဝ်းၵၼ် တႃႇတေ ၸွႆႈထႅမ် ယူႇၶရဵၼ်း ၼမ်လိူဝ်မႃး ယွၼ်ႉ ယူႇၶရဵၼ်း ၶတ်းၶၢၼ်ႉ လွင်ႈပူၼ်ႉပႅၼ် ရတ်ႈသျႃး လႄႈ တႃႇတေ ၸႂ်ႉၸၢႆႇ ငိုၼ်း တႃႇၵႅတ်ႇၵင်ႈ မိူင်းယူႇၶရဵၼ်း ၼႆယဝ်ႉ။ လွင်ႈၼႆႉ မိူင်းၾရၢင်ႇသဵတ်ႈ ပိုၼ်ၽၢဝ်ႇဝႆႉ မိူဝ်ႈပႆႇတႄႇဢုပ်ႇဢူဝ်းၵၼ်။ ၼႂ်းၵႄႈ လွင်ႈမႆႈၸႂ် ဢၼ်ဢမႄႇရိၵၢၼ်ႇ ၵိုတ်းယိုတ်း လွင်ႈၸွႆႈထႅမ် ပၢင်တိုၵ်း တီႈမိူင်းယူႇၶရဵၼ်း ဝၢႆးသေ ၸွမ်ပွင်ၸိုင်ႈ တေႃႇၼႄႇထရမ်ႉ လႆႈဢႃႇၼႃႇမႃးၼၼ်ႉ ၸွမ်ပွင်ၸိုင်ႈ ၾရၢင်ႇသဵတ်ႈ Emmanuel Macron လၢတ်ႈဝႃႈ ယူးရူပ်ႉ တေသိုပ်ႇတႅပ်းတတ်း ဢၼ်မၼ်ႈၵႅၼ်ႇၵႂႃႇယူႇ ၼႆယဝ်ႉ။

ဝၢႆးသေ ၸွမ်ပွင်ၸိုင်ႈ ၸႄးလႅၼ်းသၵီး လႄႈ ၸွမ်ပွင်ၸိုင်ႈထရမ်ႉ ၽိတ်းမေႃးၵၼ် တီႈႁိူၼ်းၽိူၵ်ႇၵႅဝ်ႈ မိူဝ်ႈဝူင်ႈပူၼ်ႉမႃးၼၼ်ႉ ဢမႄႇရိၵၢၼ်ႇ ၵိုတ်းယိုတ်း လွင်ႈၸွႆႈထႅမ် ၵၢၼ်သိုၵ်း တီႈမိူင်းယူႇၶရဵၼ်းၼၼ်ႉယဝ်ႉ။

မိူဝ်ႈဝၼ်းပုတ်ႉၼၼ်ႉ ၽူႈၵွၼ်း CIA ၵျွၼ်ႇရႅတ်ႉၶလိပ်ႉ ပိုၼ်ၽၢဝ်ႇဝႃႈ ၸုမ်းၶဝ် ၵိုတ်းယိုတ်း လွင်ႈၽႄမႅင်ႇ ၶေႃႈမုၼ်း ၸွမ်း မိူင်းယူႇၶရဵၼ်း ၼႆယဝ်ႉ။

ၸွမ်ပွင်ၸိုင်ႈ ၸႄးလႅၼ်းသၵီး တွပ်ႇလၢတ်ႈဝႃႈ မၼ်းၼႅင်ၸႂ်ၸွမ်း လွင်ႈဢၼ် လႆႈဢုပ်ႇဢူဝ်းထဵင်မေႃးၵၼ် တီႈႁိူၼ်းၽိူၵ်ႇၵႅဝ်ႈၼၼ်ႉသေ တႃႇတေဢုပ်ႇဢူဝ်း လွင်ႈငမ်းယဵၼ်ၼၼ်ႉ မၼ်းတူဝ်ႈတၼ်းဝႆႉယူႇ ၼႆယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=မိူင်းၾရၢင်ႇသဵတ်ႈ_တေၸႅၵ်ႇၽႄၶၢဝ်ႇငၢဝ်းၵၢၼ်ၸွပ်ႇပၼ်_ယူႇၶရဵၼ်း&oldid=11369"