မိူင်းၶႄႇ ပိုၼ်ၽၢဝ်ႇဝႃႈ ၸုမ်းဢွၵ်ႇတၢင်း ဢႃႇသီႇယၼ်ႇ တေဢမ်ႇလႆႈသႂ်ႇဝီႇၸႃႇ
ဝၼ်းဢင်းၵၢၼ်း၊ ၾႅပ်ႇဝႃႇရီႇ 11၊ 2025
မိူင်းၶႄႇ ပိုၼ်ၽၢဝ်ႇဝႆႉဝႃႈ တႄႇဢဝ်မိူဝ်ႈၼႆႉၵႂႃႇ ၵူၼ်းမိူင်းၸိုင်ႈမိူင်း ဢေးသျႃးၸဵင်ႇၸၢၼ်းဝၼ်းဢွၵ်ႇ သင်ဝႃႈ ၵႂႃႇဢႅဝ်ႇလႄႇ ပဵၼ်ၸုမ်းပဵၼ်ၸုမ်းၼႆ တေဢမ်ႇလႆႈသႂ်ႇဝီႇၸႃႇသေ ေတေၸၢင်ႈၶဝ်ႈၵႂႃႇဢႅဝ်ႇလႄႇ ၼႂ်းၸႄႈတွၼ်ႈ သိပ်းသွင်ပၢၼ်းၼႃး မိူင်းၶႄႇ ဝႃႈၼႆယဝ်ႉ။
ၼႂ်းၶေႃႈပိုၼ်ၽၢဝ်ႇ ႁွင်ႈၵၢၼ်ၾၢႆႇၵူတ်ႇထတ်းၵူၼ်းၶဝ်ႈမိူင်း မိူင်းၶႄႇ ပိုၼ်ၽၢဝ်ႇၵႂႃႇ မိူဝ်ႈၾႅပ်ႇဝႃႇရီႇ 10 ဝၼ်းၼၼ်ႉဝႃႈ၊ တွၼ်ႈတႃႇၵူၼ်းမိူင်းဢႃႇသီႇယၼ်ႇ ၵႂႃႇမႃး ၼႃႈလိၼ်ၽွင်းငမ်းတူဝ်ၵဝ်ႇၶိုၵ်ႉတွၼ်း သိပ်းသွင်ပၢၼ်းၼႃး ၸႄႈမိူင်းယုၼ်ၼၢၼ် ၼၼ်ႉ ဢမ်ႇတၢပ်ႈလူဝ်ႇဢဝ်ဝီႇၸႃႇ ဝႃႈၼႆယဝ်ႉ။ တီႈသိပ်းသွင်ပၢၼ်းၼႃး ဢၼ်ပဵၼ် တီႈၸၢဝ်းၶိူဝ်းတႆး ယူႇသဝ်းၼၼ်ႉ မီးဝႆႉ ၵျွင်းၽြႃး၊ တၢင်းႁၢင်ႈလီသၽႃႇဝ၊ ပိုၼ်ႉတီႈၼႆႉ ပဵၼ်တီႈၵူၼ်းမႃးဢႅဝ်ႇလႄႇ သူင်ၸႂ် ယွၼ်ႉပိူဝ်ႈ ၾိင်ႈငႄႈၾိင်ႈထုင်း လႄႈ ပွႆးသွၼ်းၼမ်ႉ ၸိူဝ်းၼႆႉယဝ်ႉ။
မိူင်းမၢၼ်ႈ၊ မိူင်းထႆး၊ မိူင်းမလေးသျႃး၊ ၵူၼ်းမႃးဢႅဝ်ႇလႄႇ ဢၼ်လုၵ်ႉတီႈ မိူင်းဢႃႇသီႇယၼ်ႇ 10 မိူင်း ပႃးၸဵမ် ဢိၼ်ႇတူဝ်ႇၼီးသျႃးၼၼ်ႉ ပေႃးၵႂႃႇဢႅဝ်ႇလႄႇ သိပ်းသွင်ပၢၼ်းၼႃးၼႆ တေလႆႈၸႂ်ႉတိုဝ်း ႁူင်းၵၢၼ်ၶၢဝ်းတၢင်း မိူင်းၶႄႇသေ ၸိူဝ်းဢၼ် မီးၵူၼ်းမႃးဢႅဝ်ႇလႄႇ တီႈဢေႇသုတ်း သွင်ၵေႃႉၼၼ်ႉၵွႆး တေလႆႈလွင်ႈလွတ်ႈၶႂၢင်းဝီႇၸႃႇ ၼႆယဝ်ႉ။ ၵူၼ်းမႃးဢႅဝ်ႇလႄႇ တီႈသိပ်းသွင်ပၢၼ်းၼႃးတႄႉ တေပၼ်ၶႂၢင်ႉယူႇသဝ်း ၼမ်သုတ်း 6 ဝၼ်းသေ တေလႆႈလုၵ်ႉတီႈ တီႈသိပ်းသွင်ပၢၼ်းၼႃး၊ ၶူင်ႇႁိူဝ်းမိၼ်ၵူႈမိူင်းမိူင်း ၵႃႇꧢႃႇ၊ တီႈ တႃႈလူတ်ႉလဵၼ်း မူဝ်ႁၢၼ် လႄႈ သဵၼ်ႈတၢင်းလူင် မူဝ်ႁၢၼ်သေ လတ်းၽၢၼ်ႇ ၶဝ်ႈၵႂႃႇဝႃႈၼႆယဝ်ႉ။
ၶၢဝ်ႇငၢဝ်း CCTV ဢၼ်လူင်ပွင်ၸိုင်ႈမိူင်းၶႄႇ ၵုမ်းၵမ်ဝႆႉၼၼ်ႉၵေႃႈ ပိုၼ်ၽၢဝ်ႇဝႃႈ ယွၼ်ႉလူင်ပွင်ၸိုင်ႈမိူင်းၶႄႇ လူတ်းယွမ်းပၼ် ပၵ်းပိူင်ဝီႇၸႃႇလႄႈ ၵူၼ်းမႃးဢႅဝ်ႇလႄႇ ၼႂ်းမိူင်းၶႄႇ ၼမ်မႃးၼႆယဝ်ႉ။ တႄႇဢဝ်လိူၼ်ၼူဝ်ႇဝႅမ်ႇပႃႇ 2024 ၼႆႉၵႂႃႇ တေလူတ်းယွမ်းပၼ် မၢႆမီႈ လွင်ႈၶဝ်ႈမိူင်းသေ ၵူၼ်းမိူင်း 38 မိူင်း တေလႆႈယူႇသဝ်း ၼႂ်းမိူင်းၶႄႇ တေႃႇထိုင် 30 ဝၼ်း လူၺ်ႈဢမ်ႇလူဝ်ႇဝီႇၸႃႇသေ ၸိူဝ်းၶႂ်ႈၵိုတ်းလိုဝ်ႈၼၼ်ႉ ယၢမ်းလဵဝ် တေလႆႈယူႇသဝ်း တေႃႇထိုင် 10 ဝၼ်း ဢၼ်မိူဝ်ႈဢွၼ်တၢင်း ပၼ်ဝႆႉ ၶၢဝ်းတၢင်း 3 ဝၼ်း တေႃႇထိုင် 6 ဝၼ်းၼၼ်ႉယဝ်ႉ။
ၸွမ်းၼင်ႇ ၸုမ်း NIA ၶဝ် ပိုၼ်ၽၢဝ်ႇဝႆႉၼၼ်ႉ ၼႂ်းၶၢဝ်းတၢင်း ဝၼ်းလိုဝ်ႈၵၢၼ်ၼၼ်ႉ ၵူၼ်းၼွၵ်ႈမိူင်း ၶၢမ်ႈလႅၼ်လိၼ် ၶႄႇ မီး 958,000 ၵေႃႉ -- ပေႃးမႃးၼိူင်းၵၼ်တင်း ဝၼ်းလိုဝ်ႈၵၢၼ် ၶၢဝ်းႁုၼ်ႈမႂ်ႇ မိူဝ်ႈပီၵၢႆၼၼ်ႉ ၼမ်လိူဝ်မႃး 22.9 ဝၢၵ်ႈၼႆယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Xinhua. "China grants visa-free entry to ASEAN tour groups visiting Xishuangbanna" — Xinhua, February 10, 2025
- Alyssa Chen. "China grants Asean tour groups visa-free access to Yunnan travel hub" — South China Morning Post, February 10, 2025
- Wang Qingyun. "ASEAN tour groups granted 6-day visa-free to Xishuangbanna" — China Daily, February 10, 2025
