မိူင်းၵမ်ႈၽွင်ႈ ယိုတ်း ငိုၼ်းလူႇ ၵူၼ်းထူပ်းၽေး ပႃးလဵတ်ႈသတၢႆး
ဝၼ်းဢင်းၵၢၼ်း၊ ၸၼ်ႇဝႃႇရီႇ 30၊ 2024
ၸုမ်းဢေႇၵျႅၼ်ႇၸီႇၸၢတ်ႈၸိုင်ႈလုမ်ႈၾႃႉ ဢၼ်ၵဵဝ်ႇၵပ်းလူၺ်ႈ ၵူၼ်းထူပ်းၽေး ပႃးလဵတ်ႈသတၢႆး UNRWA ဝႃႈ ပေႃးဢမ်ႇလႆႈ ငိုၼ်းၵွင်ၵၢင်ထႅင်ႈၼႆ ၵၢၼ်ငၢၼ်းပုၼ်ႈၽွၼ်း ၸိူဝ်းၶဝ်ႁဵတ်းယူႇတီႈ ပွတ်းဢွၵ်ႇတွၼ်ႈၵၢင််ၼၼ်ႉ တႄႇဢဝ် ဝၢႆးလင် လိူၼ်ၾႅပ်ႇဝႃႇရီႇၵႂႃႇၼၼ်ႉ တေဢမ်ႇၸၢင်ႈ သိုပ်ႇႁဵတ်းလႆႈယဝ်ႉ ဝႃႈၼၼ်။
ယွၼ်ႉပိူဝ်ႈ လူင်ပွင်ၸိုင်ႈ ဢိတ်ႇသရေးၶဝ် မၢပ်ႇမႂ်ဝႃႈ တီႈ လွင်ႈတိုၵ်း မိူဝ်ႈ ဢွၵ်ႇထူဝ်ႇပႃႇ 7 ဝၼ်းၼၼ်ႉ ၸိူဝ်းပဵၼ် ၽူႈႁၢပ်ႇၵၢၼ် UNRWA ၵေႃႈ ၶဝ်ႈၵပ်းၵၢႆႇပႃး ဝႃႈၼႆလႄႈ ၸိူဝ်းပဵၼ်မိူင်း ၵျႃႇမၼီႇ၊ ၾရၢင်ႇသဵတ်ႈ၊ ဢမႄႇရိၵၢၼ်ႇ လႄႈ ယူႇၶေႇ ၶဝ် လႆယိုတ်းပဵၼ် ငိုၼ်းလူႇ ၼင်ႇၼၼ်ယဝ်ႉ။
ထၢၼ်ၽွင်းလူင်ၵၢၼ်ၼွၵ်ႈမိူင်း ၵျႃႇမၼီႇ မွၵ်ႇလၢတ်ႈဝႃႈတႄႉ လူင်ပွင်ၸိုင်ႈၵျႃႇမၼီႇ တိုၵ်ႉဝူၼ်ႉသွၼ်ႇဝႃႈ တေမီးလွၵ်းလၢႆးတၢင်ႇလၢႆးသင် ဢၼ်တေၸၢင်ႈ ၸွႆႈထႅမ် ၵူၼ်းမိူင်းၵႃႇၸႃႇ ဢၼ်ဝႃႈၼၼ်ႉယူႇ ၼႆယဝ်ႉ။
ၽူႈယႂ်ႇ ၶွင်ႇၸီႇ ၵူၼ်းထူပ်းၽေး ၼေႃႇဝူၺ်း ယၢၼ်ဢႅၵ်ႉလႅၼ်ႇ မွၵ်ႇလၢတ်ႈ ပီႇပီႇၸီႇဝႃႈတႄႉ လွင်ႈဢၼ်ယိုတ်း ငိုၼ်းၵွင်ၵၢင် ၸုမ်းၸၢတ်ႈၸိုင်ႈလုမ်ႈၾႃႉ ဢၼ်ဝႃႈၼႆႉ မၼ်းပဵၼ် လွင်ႈဢမ်ႇဝူၼ်ႉဢမ်ႇသွၼ်ႇသင်သေ ႁဵတ်းၵႂႃႇ ဝႃႈၼႆယဝ်ႉ။
ၵူၼ်းမိူင်းပႃးလဵတ်ႈသတၢႆး တီႈ ၵႃႇၸႃႇ လႄႈ တီႈတၢင်ႇၸိူဝ်းတၢင်ႇလႅၼ် ၸိူဝ်းမီး ႁူဝ်သႅၼ်မၼ်းၼႆႉ ၶဝ်လႆႈပိုင်ႈဢိင်ၼိူဝ် ၸုမ်း UNRWA ဝႆႉယူႇ။
ၽၢႆႇႁႃးမၢတ်ႉသ်ၶဝ်ၵေႃႈ လႆႈသႄႉသွမ်းၼိူဝ် လွင်ႈယိုတ်းငိုၼ်းၵွင်ၵၢင် ၼႆႉယဝ်ႉ။ "UNRWA ၼႆႉ ထုၵ်ႇမိူင်းၸိူဝ်းၵမ်ႉထႅမ် ဢိတ်ႇသရေး ၶဝ် ၵမ်ၵိၼ်းယူႇ ဢၼ်ဝႃးၼၼ်ႉ မၼ်းၸႅင်ႈလႅင်းလီယူႇယဝ်ႉ။ တီႈၵႃႇၸႃႇၼႆႉ ၸိူဝ်းပဵၼ် ၵူၼ်းမိူင်းပႃးလဵတ်ႈသတၢႆးၶဝ် လႆႈထူပ်းၺႃး လွင်ႈထုၵ်ႇၽဵဝ်ႈမူၺ်ႉ ၶိူဝ်းၵူၼ်းယူႇၼႆ တေလႆႈႁၼ် ၸွမ်းၼင်ႇ လုမ်းတတ်းသိၼ် ၵူႈမိူင်းမိူင်း ICJ လၢတ်ႈဝႆႉယူႇ" ၼႆယဝ်ႉ။ ၶဝ်ၶႂ်ႈမၢႆထိုင် ဢၼ် လုမ်းတတ်းသိၼ်ၵူႈမိူင်းမိူင်း ၶွင် ၸုမ်းၸၢတ်ႈၸိုင်ႈလုမ်ႈၾႃႉ ICJ တမ်းၶေႃႈပူင်ဝႃႈ ဢိတ်ႇသရေးၼႆႉ တေလႆႈၵႅတ်ႇၵင်ႈ လွင်ႈႁဵတ်းသၢင်ႈ ၵၢၼ်ၽဵဝ်ႈမူၺ်ႉၵူၼ်း တီႈ ၵႃႇၸႃႇ ဢၼ်ဝႃႈၼၼ်ႉယဝ်ႉ။
ငိူၼ်ႈငဝ်ႈတိုၼ်း
[မႄးထတ်း | မႄးထတ်းငဝ်ႈငႃႇ]- BBC. "ပါလက်စတိုင်းဒုက္ခသည်တွေအတွက် နိုင်ငံတချို့ အလှူငွေဆိုင်းငံ့" — BBC, January 30, 2024
- Bethan McKernan. "UK, US and other countries to pause funding for key UN aid agency for Palestinian refugees" — The Guardian, January 28, 2024
