Jump to content

မိူင်းယူႇၶရဵၼ်း လႄႈ မိူင်းဢမႄႇရိၵၢၼ်ႇ တေလူင်းလၢႆးမိုဝ်း ၵၢၼ်ႁႃၶူဝ်းႁႄႈ ဢၼ်ဢမ်ႇသူႈမီး

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းၽတ်း၊ ၾႅပ်ႇဝႃႇရီႇ 27၊ 2025

ၸွမ်ပွင်ၸိုင်ႈယူႇၶရဵၼ်း ဝေႃႇလေႃႇတီးမႃးရ် ၸႄးလႅၼ်းသၵီး

မိူဝ်ႈဝၼ်းပုတ်ႉၼၼ်ႉ ၸွမ်ပွင်ၸိုင်ႈ ဢမႄႇရိၵၢၼ်ႇ တေႃႇၼႄႇထရမ်ႉ လၢတ်ႈတီႈပၢင်ၵုမ် လူင်ပွင်ၸိုင်ႈ ပွၵ်ႈဢွၼ်တၢင်းသုတ်းဝႃႈ တေလူင်းလၢႆးမိုဝ်း ၶေႃႈတူၵ်းလူင်း ၵဵဝ်ႇၵပ်းလူၺ်ႈ ၽွၼ်းလီ ၵၢၼ်ႁႃၶူဝ်းႁႄႈ ဢၼ်ဢမ်ႇသူႈမီး တင်း ၸွမ်ပွင်ၸိုင်ႈ ယူႇၶရဵၼ်း Volodymyr Zelenskyy ဝႃႈၼႆယဝ်ႉ။

“ပေႃးဝၼ်းသုၵ်း ၸွမ်ပွင်ၸိုင်ႈ ၸႄးလႅၼ်းသၵီး တေမႃးတီႈၼႆႈ” ဝႃႈၼႆယဝ်ႉ။ လွင်ႈၼႆႉ ယၢမ်းလဵဝ် ယိုၼ်ယၼ်လႆႈယူႇ။ ႁဝ်းၶႃႈတေလူင်းလၢႆးမိုဝ်း ၶေႃႈၽွမ်ႉၸႂ်၊ လွင်ႈၼႆႉ တေပဵၼ်လွင်ႈၽွမ်ႉၸႂ်ယႂ်ႇလူင်တႄႉတႄႉ” ၼႆယဝ်ႉ။

ၶေႃႈတူၵ်းလူင်းဢၼ်ၼႆႉ တေပၼ်သုၼ်ႇ ဢမႄႇရိၵၢၼ်ႇ တႃႇၶုတ်းႁႄႈ ဢၼ်ဢမ်ႇသူႈမီး ဢၼ်မီးၼမ်ႉတွၼ်း တင်းၼမ် ဢၼ်မီးတီႈမိူင်းယူႇၶရဵၼ်းၼၼ်ႉသေ တေပႃးလွင်ႈသၢႆႈတႅၼ်းငိုၼ်း တႃႇ ၶိူင်ႈၵွင်ႈၵၢင်ႇ ဢၼ်ဢမႄႇရိၵၢၼ်ႇပၼ် မိူင်းယူႇၶရဵၼ်း တႃႇၸွႆႈထႅမ် ႁႂ်ႈမၼ်းၶႄႉၶဵင်ႇ လွင်ႈပူၼ်ႉပႅၼ် ရတ်ႈသျႃးၼၼ်ႉ ၼႆယဝ်ႉ။ ဝၼ်းသုၵ်းၼႆႉ ႁိူၼ်းၽိူၵ်ႇၵႅဝ်ႈ တေလူင်းလၢႆးမိုဝ်းသေ တေဢုပ်ႇၵုမ်ၵၼ် လွင်ႈငဝ်းလၢႆး ပၢင်တိုၵ်းၼၼ်ႉယူႇ။

ထရမ်ႉ လၢတ်ႈဝႃႈ ၶေႃႈတူၵ်းလူင်းၼႆႉ တေပဵၼ်ၽွၼ်းလီ တႃႇႁဝ်းၶႃႈ တင်းၼမ်ၼႆသေတႃႉ ယိူင်းဢၢၼ်းဢွၼ်တၢင်းသုတ်း မၼ်းတႄႉ တႃႇတေၵိုတ်းယိုတ်း ပၢင်တိုၵ်း ဢၼ်ႁဵတ်းႁႂ်ႈ ၵူၼ်းသိုၵ်း ရတ်ႈသျႃး လႄႈ ယူႇၶရဵၼ်း၊ ၵူၼ်းမိူင်းယူႇၶရဵၼ်း လႆႈတၢႆ လႄႈ လႆႈမၢတ်ႇၸဵပ်း ၼပ်ႉႁူဝ်ႁဵင်ၼၼ်ႉ ၼႆယဝ်ႉ။

လွင်ႈၵွင်ႈၵၢင်ႇ ဢၼ်ဢမႄႇရိၵၢၼ်ႇ ၸွႆႈထႅမ်ပၼ် မိူင်းယူႇၶရဵၼ်း ဢၼ်ၵိုင်ႇငိုၼ်းတေႃႇလႃႇ 100 ပီႇလီႇယၼ်ႇလိူဝ်လိူဝ်ၼၼ်ႉ ထရမ်ႉ လၢတ်ႈဝႃႈ “လွင်ႈတၢင်းမၢႆသွင်တႄႉ တႃႇတေလႆႈၶိုၼ်းငိုၼ်း ၸိူဝ်းဢၼ်လႆႈ ၵမ်ႉၸွႆႈဝႆႉၼၼ်ႉ” ၼႆယဝ်ႉ။

ယၢမ်းလဵဝ် ရတ်ႈသျႃး ၵုမ်းၵမ်ဝႆႉ ၼႃႈလိၼ် ဢၼ်ၸၼ်ႉလုမ်ႈၾႃႉ ႁပ်ႉႁွင်းဝႆႉဝႃႈ ပဵၼ်ၼႃႈလိၼ် ယူႇၶရဵၼ်းၼၼ်ႉ ႁႃႈပုၼ်ႈၼိုင်ႈပုၼ်ႈသေ လၢတ်ႈဝႃႈ တေဢမ်ႇပၼ်ၶိုၼ်း ၼႃႈလိၼ်ၸိူဝ်းၼႆႉ ၸွမ်းၼင်ႇ ၶေႃႈတူၵ်းလူင်း လွင်ႈငမ်းယဵၼ် ဢၼ်လႂ်သေဢမ်ႇဝႃႈ ၼႆယဝ်ႉ။

ၸွမ်ပွင်ၸိုင်ႈထရမ်ႉ လၢတ်ႈဝႃႈ မၼ်းမုင်ႈမွင်းဝႃႈ လိုၼ်းသုတ်းမႃး တေၸၢင်ႈလႆႈၶေႃႈတူၵ်းလူင်း ၼႂ်းၵႄႈ ၸွမ်ပွင်ၸိုင်ႈ ယူႇၶရဵင်း ၸႄးလႅၼ်းသၵီး လႄႈ ၸွမ်ပွင်ၸိုင်ႈ ရတ်ႈသျႃး ပူႇတိၼ်ႇ ၼႆယဝ်ႉ။ တႃႇတေၵိုတ်းယိုတ်း ပၢင်တိုၵ်းၼၼ်ႉ ထရမ်ႉ တႄႇဢုပ်ႇဢူဝ်းၵၼ်တင်း ပူႇတိၼ်ႇသေ မိူဝ်ႈဝူင်ႈပူၼ်ႉမႃးၼၼ်ႉ ၽူႈမီးပုၼ်ႈၽွၼ်း ၽၢႆႇၼွၵ်ႈမိူင်း ဢမႄႇရိၵၢၼ်ႇလႄႈ ရတ်ႈသျႃး ဢုပ်ႇဢူဝ်းၵၼ် ပွၵ်ႈဢွၼ်တၢင်းသုတ်းၼၼ်ႉ ပႃးၽွင်းလူင် ၽၢႆႇၼွၵ်ႈမိူင်း ဢမႄႇရိၵၢၼ်ႇ မႃႇၶူဝ်ႇရူဝ်ႇပီႇယူဝ်ႇ လႄႈ ၽွင်းလူင်ၽၢႆႇၼွၵ်ႈမိူင်း ရတ်'သျႃး သႃႇၵျီႇလႃႇဝရူဝ်ႇ ၵူၺ်းၵႃႈ ဢမ်ႇပႃး ၽူႈတၢင်တူဝ် မိူင်းယူႇၶရဵၼ်း လႄႈ မိူင်းဢူၺ်းလီ မိူင်းယူးရူပ်ႉၶဝ်။

ထရမ်ႉ လၢတ်ႈဝႃႈ “ယွၼ်ႉမၼ်းပႄႉပၢင်လိူၵ်ႈတင်ႈ လႄႈ ပၢင်တိုၵ်းဢၼ်ၼႆႉ တေၸၢင်ႈယဝ်ႉတူဝ်ႈၵႂႃႇလႆႈယူႇ” ၼႆယဝ်ႉ။ ၽူႈဢွၼ်ႁူဝ် ရတ်ႈသျႃး ပူႇတိၼ်ႇ လၢတ်ႈဝႃႈ “မိူဝ်ႈပူၼ်ႉမႃး မၼ်းဢမ်ႇယိူင်းဢၢၼ်း တႃႇတေလႆႈ ၶေႃႈတူၵ်းလူင်းသင်” ၼႆယဝ်ႉ။ ၵူၺ်းၵႃႈ ၸွမ်ပွင်ၸိုင်ႈဢမႄႇရိၵၢၼ်ႇ ထရမ်ႉ ပၼ်ၾၢင်ႉဝႃႈ ၼင်ႇႁိုဝ် တေလႆႈလွင်ႈငမ်းယဵၼ်ၼၼ်ႉ ယူႇၶရဵၼ်း တေလႆႈလိုမ်းပႅတ်ႈ လွင်ႈၶဝ်ႈပႃးၼႂ်း ၸုမ်းၼေႇတူဝ်း (NATO) ဢၼ်ပဵၼ် ၸုမ်းဢူၺ်းလီ မိူင်းဝၼ်းတူၵ်း ဢၼ်လမ်ႇလွင်ႈၼၼ်ႉၼႆယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=မိူင်းယူႇၶရဵၼ်း_လႄႈ_မိူင်းဢမႄႇရိၵၢၼ်ႇ_တေလူင်းလၢႆးမိုဝ်း_ၵၢၼ်ႁႃၶူဝ်းႁႄႈ_ဢၼ်ဢမ်ႇသူႈမီး&oldid=11218"