ပၢင်ၵႅဝ်ႈဝၼ်းၵိူတ်ႇ ၶူးဝႃးဝုၼ်းၸုမ်ႉ

ဝၼ်းၸၼ်၊ ၸၼ်ႇဝႃႇရီႇ 5၊ 2026

ဝၼ်းထိ (5.1.2026) ၼႆႉ ပဵၼ်ဝၼ်းၵိူတ်ႇ ၶူးဝႃးဝုၼ်းၸုမ်ႉ ဢၼ်ၵူၼ်းတင်းၼမ် ဢွၼ်ၵၼ်ႁွင်ႉဝႃႈ ၸဝ်ႈမိူင်းၽူင်းၼၼ်ႉယဝ်ႉ။ ပွႆးဝၼ်းၵိူတ်ႇၸဝ်ႈ ဝၼ်းမိူဝ်ႈၼႆႉတႄႉ ပဵၼ်ဝၼ်းဢၼ်ၸဝ်ႈၶူးဝႃးဝုၼ်းၸုမ်ႉ ၶဝ်ႈဢတိတ်ႉထၢၼ်ႇ ဢမ်သဵင် (ဢမ်ႇလၢတ်ႈၵႂၢမ်း၊ တၢၼ်းၸီႇဝိတ်ႉ (ဢမ်ႇၵိၼ်ၼမ်ႉ ဢမ်ႇၵိၼ်ၶဝ်ႈ) ၶၢဝ်းတၢင်း 24 ၸူဝ်ႈမွင်း ၵူႈပီပီယဝ်ႉ။

ပိၵ်ႉသမ်ႉဝႃႈ ၸဝ်ႈဢမ်ႇလၢတ်ႈၵႂၢမ်းသေတ ၵၢင်ၼႂ်ၸဝ်ႉၼႂ်ၼႆႉ ၸဝ်ႈလုၵ်ႉမႃး တီႈဝတ်ႉၽြႃးဢိၼ်းသၢၼ်သေ မႃးဝႆႈၽြႃး မႃးတၢင်ႇသွမ်းၽြႃး ၸွမ်းလုၵ်ႈၼွင်ႉတပႄး ၸဵမ်ၸဝ်ႉယဝ်ႉ။ တႃႇလွတ်ႈႁေႃးသုတ်ႇမုၼ်းၼၼ်ႉ လုၵ်ႈၼွင်ႉတပႄးၸဝ်ႈ ႁဵတ်းသၢင်ႈႁၢင်ႈပွင်ၵႂႃႇ တင်းသဵင်ႈသေ ၸဝ်ႈၶူးဝႃးဝုၼ်းၸုမ်ႉတႄႉ တုပ်ႇသူပ်းဝႆႉ၊ ႁွမ်းမိုဝ်းဝႆႈ ဢဝ်ဢႃႇရူင်ႇၸပ်းထိုင် ၽြႃးပဵၼ်ၸဝ်ႈၵႂႃႇယူႇ။ လူဝ်ႇၵႂႃႇတၢင်းလႂ် လူဝ်ႇႁဵတ်းသင် လူဝ်ႇဢဝ်သင်ပၼ်ၵေႃႉလႂ်ၼႆၵေႃႈ ၸဝ်ႈၸိၼႄဢဝ် ၼႄပၼ်ႁၢင်ႈၽၢင်သေပိူင်ပိူင်သေ တပႄး ၸိူဝ်းၸမ်ၸႂ် ႁူႉလွင်ႈၵၼ်ၼၼ်ႉ ႁဵတ်းသၢင်ႈပၼ်ၵႂႃႇ ၸွမ်းၼင်ႇ ၵၢင်ၸႂ်ၸဝ်ႈၶႂ်ႈပဵၼ်ၼၼ်ႉယဝ်ႉ။

ဝၼ်းထိ 5 မိူဝ်ႈၼႆႉ ဝၢႆးဝၼ်း 2 မွင်းပၢႆၼၼ်ႉ ပဵၼ်ၶၢဝ်းယၢမ်း သုၵ်ႈၼႃႈလၢင်ႉတႃ သွၼ်းတိၼ်သွၼ်းမိုဝ်းၸဝ်ႈယဝ်ႉ။ ဢွင်ႈတီႈမၼ်းတႄႉ ၸတ်းႁဵတ်းၵႂႃႇ တီႈသူၼ်ဢုယဵၼ်ႇ ဢၼ်မီးၽၢႆႇၼႃႈ ၵျွင်းၽြႃးဢိၼ်းသၢၼ်ၼၼ်ႉယဝ်ႉ။ တပႄးပရိသတ်ႈ တႄႇဢဝ်တီႈ ထၢတ်ႈရွၼ်းရိူင်း (ထၢၼ်ႈတွၼ်းႁိူင်း) ဢဝ်ဝေႃးႁၢမ်ဢဝ် ၶူးဝႃးဝုၼ်းၸုမ်ႉသေ မႃးၸူး တီႈသူၼ်။ ပရိသတ်ႈဢွၼ်ၵၼ် ဢဝ်တီႈယူႇဝႆႉ သွင်ၽင်ႇၶၢင်ႈတၢင်းသေ ပႂ်ႉဝႆႈပႂ်ႉသႃ။ ၸိူဝ်းပဵၼ် လုၵ်ႈၼွင်ႉတပႄးၸဝ်ႈ ဢၼ်ပဵၼ် ၸုမ်းမၢၵ်ႇႁူဝ်ၶမ်းၶဝ် ၸုမ်းတႃးသႃ တႃးသီၶဝ် ဢုမ်ႇလွမ်ႉၸဝ်ႈသေ ဢဝ်ဝေႃးႁၢမ် ပၢင်းဢဝ်ၸဝ်ႈမႃးၸူး ဢွင်ႈတီႈ တေသွၼ်းၼမ်ႉမင်ႇၵလႃႇၼၼ်ႉယဝ်ႉ။ သင်ႇၶႃႇၸဝ်ႈၶဝ်တႄႉ မႃးပႂ်ႉလွမ်ႉႁွပ်ႈဝႆႉ ဢွင်ႈတီႈ တေသွၼ်းတိၼ်သွၼ်းမိုဝ်းၼၼ်ႉယူႇ။

ပေႃးဝႃႈ ႁၢမ်ဝေႃး ထိုင်မႃးဢွင်ႈတီႈမၼ်းယဝ်ႉၵေႃႈ ၶူးဝႃးလူင်းဝေႃးသေ မႃးၼင်ႈတီႈႁၢင်ႈႁႅၼ်းဝႆႉ သင်ႇၶႃႇသြႃႇၸဝ်ႈၶဝ် သွၼ်းလူႇၼမ်ႉပၼ်ၶူးဝႃး၊ ပီ 2026 ၼႆႉ ၸဝ်ႈသြႃႇသုၶမ်း လႄႈ ၸဝ်ႈၶူးလူင်တွၵ်ႇတိူဝ်ႇၶမ်းမၢႆထမ်ႇမသႃႇမိ ဢွၼ်ႁူဝ်သင်ႇၶႃႇသေ လူႇၼမ်ႉသွၼ်းပၼ်ၶူးဝႃးဝုၼ်းၸုမ်ႉယဝ်ႉ။ ဝၢႆးၼၼ်ႉ တၵႃႇလူင်ၸိူဝ်းၸမ်ၸႂ်ၸိူဝ်းၼၼ်ႉ ဢွၼ်ၵၼ် မႃးဢဝ်ၵုသူဝ်ႇ လူႇပၼ်ၼမ်ႉသွၼ်း တမ်ႈတီႈ ၸဝ်ႈယဝ်ႉ။ ၸဝ်ႈၵေႃႈ ႁပ်ႉတုင်းဢဝ်ၼမ်ႉၼၼ်ႉသေ သုၵ်ႈၼႃႈလၢင်ႉတႃႇ သုၵ်ႈမိုဝ်းၵႂႃႇ။ သင်ႇၶႃႇၸဝ်ႈၶဝ်ၵေႃႈ ႁေႃးလွတ်ႈသုတ်ႇမုၼ်းပၼ်ၵႂႃႇ တေႃႇပေႃးယဝ်ႉယူႇ။

ဝၢႆးသွၼ်းတိၼ်သွၼ်းမိုဝ်းယဝ်ႉ ၶပ်ႉမၢႆမၼ်း ၶိုၼ်းဢွၼ်ၵၼ် ၵႂႃႇဝႆႈသႃ ၽြႃးဢိၼ်းသၢၼ် ၸႅၵ်ႇဝၢၵ်ႈၵုသူဝ်ႇၵႂႃႇယဝ်ႉ။ ဝၢႆးၼၼ်ႉ ၶူးဝႃးၶိုၼ်းမိူဝ်းလိုဝ်ႈ တီႈၽိတ်ႇငႅဝ်ၵူၼ်းသေ ထိုင်မႃး ႁူဝ်ၶမ်ႈ ၸင်ႇၶိုၼ်း ယေႃးၶိင်းမႃး တီႈၶဵင်ႇႁေႃးထမ်းယဝ်ႉ။

တၢမ်းၶမ်ႈ 6 မွင်း ပရိသတ်ႈလႄႈ သင်ႇၶႃႇၸဝ်ႈၶဝ် မႃးဢဝ်တီႈယူႇဝႆႉ တီႈသူၼ်မွၵ်ႇၶဵင်ႇႁေႃးထမ်းသေ ၶၢဝ်း 6 မွင်းပၢႆ ၸဝ်ႈၶူးဝႃးဝုၼ်းၸုမ်ႉ ႁွတ်ႈထိုင်မႃးယဝ်ႉ။ ဢဝ်ၸွမ်းၼင်ႇ ၶပ်ႉမၢႆသေ ၸဝ်ႈသြႃႇသုၶမ်းတၢင်ႉယၢၼ်း ႁေႃးတြႃးပၼ်ၵႂႃႇ၊ ဝၢႆးၼၼ်ႉ ၸဝ်ႈၶူးလူင်တွၵ်ႇတိူဝ်ႇထမ်ႇမသႃႇမိ ႁေႃးတြႃးပၼ်ၵႂႃႇ။ ဝၢႆးႁေႃးတြႃးထွမ်ႇတြႃးယဝ်ႉ ၶိုၼ်းဢွၼ်ၵၼ် ဝႆႈၽြႃး ၼင်ႈၽႃႇဝၼႃႇ ယၢတ်ႇၼမ်ႉ ၸႅၵ်ႇၽႄၵုသူဝ်ႇၵႂႃႇသေ ၶပ်ႉမၢႆ ယဝ်ႉတူဝ်ႈၵႂႃႇ ၶၢဝ်းယၢမ်း 9:45 ၼၼ်ႉယဝ်ႉ။

ယွၼ်းသူးပၼ် ႁႂ်ႈၶူးဝႃးပေႃးၽယႃးသိၼ်ထမ်းဝုၼ်းၸုမ်ႉ ဢႃႇယုယိုၼ်းယၢဝ်း သိုပ်ႇဢွၼ်ႁူဝ် ပွင်ၵၢၼ်သႃႇသၼႃႇၵႂႃႇလႆႈထႅင်ႈ ပီယၢဝ်းၶၢဝ်းႁိုဝ်သေၵမ်း။

ႁွင်ႈၼႄပၢႆးမွၼ်း

ၶႅပ်းႁၢင်ႈမၢႆတွင်း ပၢင်ၵႅဝ်ႈဝၼ်းၵိူတ်ႇ ၶူးဝႃးဝုၼ်းၸုမ်ႉ ပီ 2026

ငိူၼ်ႈငဝ်ႈၶၢဝ်ႇ

ဝီႇၶီႇၶၢဝ်ႇ

လိၵ်ႈႁွမ်တွမ် ၶၢဝ်ႇႁူဝ်ၼႆႉ ၼႆႉ ပဵၼ်ၵၢၼ်သိုဝ်ႇၶၢဝ်ႇ မိုဝ်းဢွၼ်တၢင်းသုတ်း လူၺ်ႈ ၽူႈၶဝ်ႈၸုမ်း ဝီႇၶီႇၶၢဝ်ႇၶႃႈဢေႃႈ။ တွၼ်ႈတႃႇ ႁူဝ်ယွႆႈမၼ်း တူၺ်းပၼ်တီႈ ၼႃႈလိၵ်ႈႁွမ်းမိုဝ်းၵၼ် ၼၼ်ႉလႄႈ။

ဝီႇၶီႇၶၢဝ်ႇ

လိၵ်ႈႁွမ်တွမ် ၶၢဝ်ႇႁူဝ်ၼႆႉ ၼႆႉ ပဵၼ် ၵၢၼ်သိုဝ်ႇၶၢဝ်ႇ မိုဝ်းဢွၼ်တၢင်းသုတ်း လူၺ်ႈ ၽူႈၶဝ်ႈၸုမ်း ဝီႇၶီႇၶၢဝ်ႇ။ တွၼ်ႈတႃႇ ႁူဝ်ယွႆႈမၼ်း တူၺ်းပၼ်တီႈ ၼႃႈလိၵ်ႈႁွမ်းမိုဝ်းၵၼ် ၼၼ်ႉလႄႈ။