ပၢင်ၵုမ်လူင်ၶွပ်ႈၶူပ်ႇ 67 ငဝ်ႈငုၼ်း မုၵ်ႉၸုမ်းလူင် သင်ႇၶႃႇၸိုင်ႈတႆး ဝၼ်းထူၼ်ႈသွင်
ဝၼ်းသဝ်၊ မေႇ 17၊ 2025
မိူဝ်ႈၼႆႉ ပီ 2025 လိူၼ်မေႇ 17 ပဵၼ်ဝၼ်းထူၼ်ႈသွင် ပၢင်ၵုမ်လူင်ၶွပ်ႈၶူပ်ႇ 67 ငဝ်ႈငုၼ်း မုၵ်ႉၸုမ်းလူင် သင်ႇၶႃႇၸိုင်ႈတႆးသေ သိုပ်ႇၸတ်းႁဵတ်း တမ်ႈတီႈ ႁူင်းထမ်းသုဝၼ်ႇၼၽူႇမိ ပီၵွၼ်းၶမ်း ဝဵင်းပၢင်လူင် ပွတ်းၼႂ်ယဝ်ႉ။
ၵၢင်ၼႂ် 7 မွင်း ဝၢႆးသေ ၸဝ်ႈမႁႃႇၼႃႇယၵ၊ ဢၼုၼႃႇယၵ၊ ဢေႃးဝႃႇတႃႇၸရိယလႄႈ သင်ႇၶႃႇပရိသတ်ႈ ဢဝ်တီႈယူႇၼိူဝ်ႁူင်းထမ်းယဝ်ႉ ဢွၼ်ၵၼ်လွတ်ႈႁေႃး ၼမေႃတသ်သ သၢမ်ၵမ်းပိုတ်ႇပၢင်ၵႂႃႇ။
ဢဝ်ၸွမ်းၼင်ၶပ်းမၢႆပၢင်ၵုမ်သေ လၢႆးငၢၼ်းၼႄ လွင်ႈၵၢၼ်ႁဵၼ်းပထမပျၢၼ်ႇ လူင်ပွင်ၸိုင်ႈ၊ လွင်ႈငိုၼ်းၵွင်ၵၢင် ၸုမ်းပၢႆးပၺ်ႇၺႃႇငဝ်ႈငုၼ်း၊ လွင်ႈတႅမ်ႈပပ်ႉလႄႈ ဢိတ်ႇပပ်ႉလၵ်းသုတ်ႇမႂ်ႇ၊ လွင်ႈပၢင်ၽိုၵ်း ၽွၼ်ႉ လၵ်ႉသုတ်ႇမႂ်ႇ၊ လွင်ႈပၢင်တွပ်ႇလိၵ်ႈလၵ်းသုတ်ႇမႂ်ႇၶၢဝ်းတၢင်းသီႇပီ၊ လွင်ႈႁူင်းႁဵၼ်းပရိယတ်ႉတိၶၢဝ်းမႆႈ၊လွင်ႈဝိၶျႃးလိၵ်ႈလႄႈ ၵၢၼ်ႁဵၼ်းလၵ်းသုတ်ႇမႂ်ႇ၊ ၽူႈတၢင်တူဝ်ၸႄႈဝဵင်း ၵမ်ႈၽွင်ႈ မႃးလၢတ်ႈၼႄ လွင်ႈၵၢၼ်တူင်ႉၼိုင်သႃႇသၼႃႇ တူင်ႇဝဵင်းၽႂ်မၼ်းၵွႃႇသေ ၵိုတ်းပၢင်ၵုမ်ၶၢဝ်းၼႂ် 10:45 မူင်းယဝ်ႉ။
ထိုင်မႃးဝၢႆးဝၼ်း 1:00 မူင်း ၶိုၼ်းတႄႇပၢင်ၵုမ်ၵႂႃႇ။
ဢဝ်ၸွမ်းၶပ်ႉမၢႆသေ လၢႆးငၢၼ်းၼႄ လွင်ႈၶၵ်ႉၵၢၼ် ၸၼ်ႉမႁႃႇထမ်ႇမႃႇၸရိ M.A၊ ၽူႈတၢင်တူဝ်ၸႄႈဝဵင်း လၢႆးငၢၼ်းၼႄ လွင်ႈတူင်ႉၼိုင် ၵၢၼ်သႃႇသၼႃႇ ၸႄႈဝဵင်းၽႂ်မၼ်း၊ ၸဝ်ႈၶူးလူင်တွၵ်ႇတိူဝ်ႇထမ်ႇမသႃႇမိ လၢတ်ႈၼႄ လွင်ႈၶၢဝ်းတၢင်းငဝ်ႈငုၼ်းမုၵ်ႉၸုမ်းလူင် သင်ႇၶၸိုင်ႈတႆး70 ပီ၊ ၸၢႆးဢုမ်ႈၶိူဝ်း လွႆလႅမ် လၢႆးငၢၼ်းၼႄ လွင်ႈၶိုပ်ႈၼႃႈ Website ငဝ်ႈငုၼ်းမုၵ်ႉၸုမ်းလူင်သင်ႇၶႃႇၸိုင်ႈတႆးယဝ်ႉ။ ၵမ်းလိုၼ်း ၽူႈမၢႆလူင် ၸဝ်ႈၶူးလူင်တွၵ်ႇတိူဝ်ႇထမ်ႇမသႃႇမိ မွၵ်ႇလၢတ်ႈ ၶေႃႈၵိုတ်းလိုဝ်ႈပၢင်ၵုမ်ၵႂႃႇယဝ်ႉ။
ၶေႃႈတႅပ်းတတ်းပၢင်ၵုမ် တႄႉ (1) မၵ်းမၼ်ႈတႅၼ်းတၢင် သြႃႇၸဝ်ႈဢေႃးဝႃႇတႃႇၸရိယ မႂ်ႇ ထႅင်ႈ 14 ၸဝ်ႈ။ (2) ၽိုၼ်မႂ်လူႇၵျွင်း ဢၢပ်ႈၵျွင်းငဝ်ႈငုၼ်း မုၵ်ႉၸုမ်းလူင်သင်ႇၶၸိုင်ႈတႆးၼၼ်ႉ ႁႂ်ႈလႆႈဢဝ် လိၵ်ႈမၼ်ႈၵႅၼ်ႇ ဢၼ်ငဝ်ႈငုၼ်းႁဵတ်းဢွၵ်ႇၼၼ်ႉၸႂ်ႉၵႂႃႇ။ (3) မၵ်းမၼ်ႈသပ်ႉၵေႃႇမတီႇ မႁႃႇထမ်ႇမႃႇၸရိယ (4)မၵ်းမၼ်ႈတေႁဵတ်းပဵၼ် လွင်ႈမၢႆတွင်း ငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး တေတဵမ် 70 ပီ ၼႂ်း 2028။
သိုပ်ႇလင်ၼၼ်ႉ လုၵ်ႈၼွင်ႉတပႄးတင်းသဵင်ႈ ဢွၼ်ၵၼ်ၵၼ်ႇတေႃး သြႃႇၸဝ်ႈလူင်မႁႃႇၼႃႇယၵ၊ ဢၼုၼႃႇယၵ၊ ဢေႃးဝႃႇတႃႇၸရိယသေ ယွၼ်းထွမ်ႇၶေႃႈဢေႃးဝႃႇတ သြႃႇၸဝ်ႈလူင်ၶဝ်ယဝ်ႉ။
ယိူင်းဢၢၼ်းႁႂ်ႈဝၢၼ်ႈမိူင်းၵတ်းယဵၼ် ၵူၼ်းမိူင်းလွတ်ႈၶဵၼ်သေ သင်ႇၶႃႇၸဝ်ႈၸိူဝ်းမႃးၶိုၼ်ႈပၢင်ၵုမ် ႁူမ်ႈၵၼ်လွတ်ႈႁေႃး ရတၼသုတ်ႈ၊ မဵတ်ႉတသုတ်ႈ ယၢတ်ႇၼမ်ႉၸႅၵ်ႇၽႄၵုသူဝ်ႇၵႂႃႇ ၶၢဝ်းယၢမ်းတၢမ်းၶမ်ႈ 5 မူင်းယဝ်ႉ။
ၶၢဝ်းယၢမ်း 5:30 သင်ႇၶႃႇၸဝ်ႈၶဝ် ဢွၼ်ၵၼ်ၵႂႃႇၵၼ်ႇတေႃႈ ၵွင်းမူးၸတုတ်ႉထမႁႃႇၼႃႇယၵ သြႃႇၸဝ်ႈလူင်ၺႃႇၼသမ်ႇၽႃႇရ တီႈဝၢၼ်ႈၼွင်လႅင်သေ ယၢတ်ႇၼမ်ႉၸႅၵ်ႇၽႄၵုသူဝ်ႇၵႂႃႇယဝ်ႉ။
