ပၢင်ၵုမ်လူင်ၶွပ်ႈၶူပ်ႇ 67 ငဝ်ႈငုၼ်း မုၵ်ႉၸုမ်းလူင် သင်ႇၶႃႇၸိုင်ႈတႆး
ဝၼ်းသုၵ်း၊ မေႇ 16၊ 2025
ပၢင်ၵုမ်လူင်ၶွပ်ႈၶူပ်ႇ 67 ငဝ်ႈငုၼ်း မုၵ်ႉၸုမ်းလူင် သင်ႇၶႃႇၸိုင်ႈတႆး လႆႈႁူႉဝႃႈ ၸတ်းႁဵတ်းၵႂႃႇ တမ်ႈတီႈ ဝဵင်းပၢင်လူင် ၵျွင်းပိတၵၢတ်ႈ ႁူင်းထမ်းသုဝၼ်ႇၼၽူႇမိ ၸွမ်းၼင်ႇၶပ်ႉမၢႆတီႈတႂ်ႈၼႆႉယဝ်ႉ။
ၵၢင်ၼႂ် 7:30 သင်ႇၶႃႇလႄႈတၵႃႇ ႁူမ်ႈၵၼ်ၵႂႃႉၵၼ်ႇတေႃး သြႃႇၸဝ်ႈလူင်ပၺ်ႇၺႃႇၽေႃးၵ (ပထမမႁႃႇၼႃႇယၵ) တီႈၵွင်းမူးမႁႃႇၼႃႇယၵသေ သုတ်ႇမုၼ်းဝၢၼ်းပရိတ်ႈ ၸႅၵ်ႇၽႄၵုသူဝ်ႇ ထႆၢႇၶႅပ်းႁၢင်ႈမၢႆတွင်းၵႂႃႇယဝ်ႉ။ သိုပ်ႇၼၼ်ႉ တႄႇဢဝ် ၶၢဝ်းယၢမ်းၵၢင်ၼႂ် 7:30 မူင်း တေႃႇထိုင် 10:45 မွင်း လႆႈႁဵတ်းပၢင်ၵုမ်ၶွပ်ႈၶူပ်ႇ ပွၵ်ႈၵမ်း 67 ဝၼ်းထိၼိုင်ႈ ပွတ်းၼႂ်ၵႂႃႇယဝ်ႉ။
လႆႈဢုပ်ႇၵုမ်ၵၼ်ၵႂႃႇ လွင်ႈၸဝ်ႈသြႃႇဢၼုၼႃႇယၵ၊ ၸဝ်ႈသြႃႇဢေႃးဝႃႇတႃႇၸရိယ ၵဵဝ်ႇၵပ်း ပၢႆးယူႇလီၶဝ်ၸဝ်ႈ၊ ၸဝ်ႈၸိူဝ်းဢၼ်လွၼ်ႇၵႂႃႇသေ လိူၵ်ႈတၢင်ႇၶိုၼ်း ဢွင်ႈပဝ်ႇ ၸိူဝ်းလုတ်ႈႁၢမ်းၵႂႃႇၼၼ်ႉယဝ်ႉ။
ဢဝ်ၸွမ်းၶပ်းမၢႆသေ ၽူႈမၢႆလူင် ငဝ်ႈငုၼ်းမုၵ်ႉၸုမ်းလူင်သင်ၶႃႇၸိုင်ႈတႆး တွၵ်ႇတိူဝ်ႇၶမ်းမၢႆထမ်ႇမသႃႇမိ လၢႆးငၢၼ်းလၢတ်ႈၼႄ လွင်ႈလႆႈႁပ်ႉဢဝ်ပုၼ်ႈၽွၼ်းၽူႈမၢႆလူင် လွင်ႈလႆႈဢွၼ်ႁူဝ်ႁဵတ်းသၢင်ႈ ၵၢၼ်ပၢႆးပၺ်ႇၺႃႇ ဢိၵ်ႇ လွင်ႈၵေႃႇသၢင်ႈ လုမ်းငဝ်ႈငုၼ်း ၸိူဝ်းၼၼ်ႉယဝ်ႉ။ ၸဝ်ႈသြႃႇၼၼ်တဝမ်ႇသ (မိူင်းၵုတ်ႈ) ၵႅမ်ႁူဝ်ပဝ်ႈ လၢတ်ႈၼႄ သၢႆငၢႆလွင်ႈပိၼ်ႇ ၵမ်ႇမႃႇၵမ်ႇမလႄႈ လွင်ႈပိၼ်ႇပိတၵၢတ်ႈ ၽၢႆႇတႆးယဝ်ႉ။
ၸဝ်ႈၽူႈမၢႆငဝ်ႈငုၼ်းၶဝ် လၢတ်ႈၼႄ သဵၼ်ႈမၢႆသင်ႇၶႃႇ ဢၼ်ၶဝ်ႈပႃးၼႂ်းငဝ်ႈငုၼ်း၊ လွင်ႈၼႃႈၵၢၼ်ပုၼ်ႈၽွၼ်း ၸုမ်းၽူႈမၢႆၸိူဝ်းၼၼ်ႉယဝ်ႉ။ လိူဝ်ၼၼ်ႉ သင်ႇၶႃႇ ၽူႈတၢင်တူဝ်ၸႄႈဝဵင်း ၵမ်ႈၽွင်ႈ မႃးလၢတ်ႈၼႄ လွင်ႈတူင်ႉၼိုင် ၵၢၼ်သႃႇသၼႃႇ တူင်ႇဝဵင်းၽႂ်မၼ်းယဝ်ႉ ၶွတ်ႇယွတ်ႈ ပၢင်ၵုမ် ပွတ်းၼႂ်ၵႂႃႇ။
ဝၢႆးဝၼ်း တႄႇဢဝ် 1:00 မူင်း တေႃႇ 5:00 မူင်း ၸဝ်ႈၽူႈမီးပုၼ်ႈၽွၼ်းၶဝ် လၢႆးငၢၼ်းၼႄ လွင်ႈငိုၼ်းႁွမ်ၽွၼ်း ငဝ်ႈငုၼ်း၊ လွင်ႈၵေႃႇသၢင်ႈလုမ်းလူင်ငဝ်ႈငုၼ်း ဝတ်ႉၼၵႃးသႅင်လႅင်၊ လွင်ႈၽိင်ႈငႄႈပုတ်ႉထ၊ လွင်ႈႁူင်းႁဵၼ်းထမ်ႇမ၊ လွင်ႈႁူင်းႁဵၼ်းပ/ၵ လႄႈ ပရႁိတ၊ လွင်ႈၸုမ်းသင်ႇၶမႁႃႇၼႃႇယၵ ၸိုင်ႈမိူင်း၊ လွင်ႈၸုမ်းပႁူဝ်ႇဝုၼ်ႇသွင်ႇၸိုင်ႈမိူင်းၸိူဝ်းၼၼ်ႉယဝ်ႉ။
ဝၢႆးၼၼ်ႉ ၽူႈတၢင်တူဝ်ၸႄႈဝဵင်း ၵမ်ႈၽွင်ႈ မႃးလၢတ်ႈၼႄ လွင်ႈတူင်ႉၼိုင် ၵၢၼ်သႃႇသၼႃႇ တူင်ႇဝဵင်းၽႂ်မၼ်းသေ မီးလွင်ႈတွင်ႈထၢမ် တွပ်ႇၵႄႈပၼ်သေ ဢဝ်လွင်ႈမၵ်းမၼ်ႈၵႂႃႇယဝ်ႉ ၶွတ်ႇယွတ်ႈ ပၢင်ၵုမ်ဝၼ်းထိၼိုင်ႈၵႂႃႇယဝ်ႉ။
ဝၢႆးပၢင်ၵုမ်ယဝ်ႉ ၶၢဝ်းယၢမ်း 5:30 မူင်း သင်ႇၶႃႇတင်းလၢႆ ဢွၼ်ၵၼ်ၵႂႃႇၵၼ်ႇတေႃး ၶုမ်ၸဝ်ႈမႁႃႇၼႃႇယၵ တူၼ်ထိသွင် ၸဝ်ႈသြႃႇမိူင်းၼွင် တမ်ႈတီႈ ၵျွင်းၵမ်ႇမထၢၼ်း ပၢင်မူင်ႈယဝ်ႉ။
