ပၢင်ၵုမ်တၢင်ႉယၢၼ်း တႃႇဝၼ်းၵိူတ်ႇၸဝ်ႈသြႃႇသုၶမ်း 64 ပီတဵမ်
ဝၼ်းပုတ်ႉ၊ မေႇ 14၊ 2025
ဝၼ်းထိ 14.5.2025 ဝၢႆးဝၼ်း 1 မွင်း တီႈၵျွင်းဢူမုၼ်ထမ်းႁူမ်ႈသႃႇ ဝဵင်းတၢင်ႉယၢၼ်းၼၼ်ႉ သြႃႇလႄႈတၵႃႇ ၼႂ်းတၢင်ႉယၢၼ်း ဢုပ်ႇၵုမ် လႆႈၸႂ်ၵၼ် တႃႇတေၸတ်းႁဵတ်း ဝၼ်းၵိူတ်ႇ ဝိၸႃႇတမင်ႇၵလႃႇ 64 ပီတဵမ် ၸဝ်ႈသြႃႇသုၶမ်းၵႂႃႇ ၸွမ်းၼင်ႇၶေႃႈတႅပ်းတတ်း တီႈတႂ်ႈၼႆႉယဝ်ႉ။
ပေႃးထိုင် ဝၼ်းထိ 26.5.2025 မႃး တွၼ်ႈ (1) ၵၢင်ၼႂ် 5 မွင်း တေဝႆႈၽြႃး လူႇသွမ်းထူၼ်ႈၸူဝ်ႈ တမ်ႈတီႈၽြႃးပဵၼ်ၸဝ်ႈ တီႈၵျွင်းၽြႃး 28 ဢူမုၼ်ထမ်းႁူမ်ႈသႃႇသေ ပၢင်းဢဝ် ၸဝ်ႈသၢင်ႇသႃႇမၼေႇ 180 တူၼ် သုတ်ႇမုၼ်းဝၢၼ်းပရိတ်ႈ ပၼ် ၸဝ်ႈဝၼ်းၵိူတ်ႇယဝ်ႉ ၵၢပ်ႈလူႇသွမ်းၼႂ်သင်ႇၶႃႇ။
တွၼ်ႈ (2) ၵၢင်ၼႂ် 8 မွင်းပၢႆ ၸဝ်ႈတႃႇၼထၢပ်ႈၵၢမ်ႇဝၼ်းၵိူတ်ႇ 14 ႁိူၼ်း ထၢပ်ႈၵၢမ်ႇယေႃးမုၼ် ၸဝ်ႈသြႃႇသုၶမ်း တီႈသိမ်ႇ ဢူမုၼ်ထမ်းႁူမ်ႈသႃႇသေ တေလူႇလွင်း ရႁၢၼ်း 100 တူၼ်ပၢႆပၢႆ ဢၼ်ဢွၵ်ႇသိမ်ႇ။ တွၼ်ႈ (3) ၶၢဝ်းယၢမ်း 9:30 မွင်း ၵႅတ်းမႆလၢႆႈ ပိုတ်ႇပၢႆႉ ႁွင်ႈၼႄပိုၼ်း ဢူမုၼ်ထမ်းႁူမ်ႈသႃႇသေ ဢွၼ်ၵၼ်ၶဝ်ႈဢႅဝ်ယဵမ်ႈတူၺ်း။
တွၼ်ႈ (4) ၵၢင်ၼႂ် 10:30 ၵၢပ်ႈသွမ်းဝၼ်း သင်ႇၶႃႇၸဝ်ႈလႄႈ ၸႃႇၵလဵင်ႉလူ ပရိသတ်ႈ ၸိူဝ်းမႃး ဝၼ်းၵိူတ်ႇ။ တွၼ်ႈ (5) ဝၢႆးဝၼ်း 1 မွင်း တႄႇပၢင်ၵႅဝ်ႈ ယၢတ်ႇၼမ်ႉ ဝၼ်းၵိူတ်ႇ ၸဝ်ႈသြႃႇသုၶမ်း ဢႃႇယု ထူၼ်ႈထိုင် 64 ပီ တီႈၼႂ်းၽြႃးလူင်ႇမႁႃႇမျၢတ်ႈမုၼိ တၢင်ႉယၢၼ်းသေ ပၼ်မႂ်ဢွင်ႇ သင်ႇၶႃႇလုၵ်ႈႁဵၼ်း ၸိူဝ်းဢွင်ႇပူၼ်ႉ လၵ်းသုတ်ႇမႂ်ႇယဝ်ႉ ယၢတ်ႇၼမ်ႉၶွမ်ႈမူၺ်ၵႂႃႇ ဝႃႈၼႆယဝ်ႉ။
