ပၢင်ယၢတ်ႇၼမ်ႉ ၵွင်းမူးမၢၵ်ႇႁိၼ်ၼမ်ႉ လေႃးၵမၢၼ်ႇဢွင်ႇ လွႆတိုင်ၶမ်း မူႇၸေႈ
ဝၼ်းဢႃးတိတ်ႉ၊ မေႇ 11၊ 2025
ဝၼ်းမိူဝ်ႈၼႆႉ ပဵၼ်ဝၼ်းလိူၼ်ႁူၵ်းမူၼ်း (ဝၼ်းပုတ်ႉထၸဝ်ႈ)လႄႈ ၽူႈပူၵ်းပွင်သႃႇသၼႃႇသၼ်လွႆ ၸဝ်ႈသြႃႇသုၶမ်း (ႁွင်ႉ) ၸဝ်ႈသုၶမိၼ်ႇတ ဢၷ်ၷမႁႃၵမ်မꩨ်ꩩႃၼႃၸရိယ၊ တၵ်ၵသီလမႁႃꩪမ်မႃၸရိယ M.A (Buddhism)., M.A (Sri Lanka) လႄႈ ၽူႈယႂ်ႇၵူၼ်းလူင် ဢိၵ်ႇ ၸုမ်းၵေႃးပၵလွႆတိုင်ၶမ်း ဢဝ်ပဵၼ်တီႈမၢႆတွင်း ဝၼ်းပုတ်ႉထၸဝ်ႈသေ ၸင်ႇတေႁဵတ်း ပၢင်ယၢတ်ႇၼမ်ႉ လူႇတၢၼ်း ၵွင်းမူးမၢၵ်ႇႁိၼ်ၼမ်ႉၵႂႃႇ ၸွမ်းၼင်ႇ ၶပ်ႉမၢႆတီႈတႂ်ႈၼႆႉယဝ်ႉ။
လႆႈၽိတ်ပၢင်း သင်ႇၶႃႇ ႁူဝ်ၵျွင်း 10 ၵျွင်း ဢိၵ်ႇၸဝ်ႈတႃႇၼၸမ်ၵႆသေ ၶၢဝ်းယၢမ်း ၵၢင်ၼႂ် 8 မွင်းပၢႆ တွၵ်ႇလၵ်းမၵ်းတီႈၵႅဝ်ႈ တႃႇတေၽုၵ်ႇ တူၼ်ႈမႆႉၺွင်ႇၽေႃးထိ ဢၼ်တေဢဝ်ႁုၼ်ႇႁၢင်ႈၽြႃး ပႅတ်ႇဢူင်း လွမ်ႉပဵၼ် ၵျူဝ်ႇပႅတ်ႇလုၵ်ႈ တီႈၽၢႆႇတူၵ်းၵွင်းမူးမၢၵ်ႇႁိၼ်ၼမ်ႉၼၼ်ႉယဝ်ႉ။ ဝၢႆးၼၼ်ႉ ၸဝ်ႈသြႃႇသုၶမ်း ဢွၼ်ႁူဝ်သင်ႇၶႃႇၸဝ်ႈၶဝ်သေ ႁူမ်ႈလူၺ်ႈ ႁူဝ်ပဝ်ႈၽၢႆႇဢုပ်ႉပိူင်ႇၸႄႈတွၼ်ႈမူႇၸေႈ ဢူးဢွင်ႇၸေႃႇမူဝ်း ႁူဝ်ပဝ်ႈၵေႃးပၵလွႆတိုင်ၶမ်း ၶိင်းၵျေႃႇဢေး ဢွၼ်ၵၼ် ၽုၵ်ႇတူၼ်ႈမႆႉၺွင်ႇၽေႃးထိယဝ်ႉ။
ထိုင်မႃး ၶၢဝ်းယၢမ်း 9 မွင်း သင်ႇၶႃႇၸဝ်ႈလႄႈ ပရိသတ်ႈ မႃးဢဝ်ဢွင်ႈ တီႈသႃလႃး ၵွင်းမူးမၢၵ်ႇႁိၼ်ၼမ်ႉသေ လွတ်ႈႁေႃး ၼမေႃ တသ်သ သၢမ်ၵမ်းပိုတ်ႇၽုၺ်ႇပၢင်ၵႅဝ်ႈ လူႇတၢၼ်းၵႂႃႇ။ ဢွၼ်တၢင်းသုတ်း ပရိသတ်ႈ ဢွၼ်ၵၼ်ၵၼ်ႇတေႃး ယွၼ်းႁပ်ႉဢဝ် သရၼၵုင်ႇ ၶၢမ်ႇသိၼ်ႁႃႈ တမ်ႈတီႈ ၸဝ်ႈသြႃႇသုၶမ်း၊ သင်ႇၶႃႇၸဝ်ႈၶဝ် သုတ်ႇမုၼ်း ဝၢၼ်းပရိတ်ႈယဝ်ႉသေ လူႇတၢၼ်းၶူဝ်းလူႇ ပၼ်သင်ႇၶႃႇၸဝ်ႈၶဝ်။ ဝၢႆးၼၼ်ႉ ၸဝ်ႈတႃႇၼၶဝ် လူႇငိုၼ်း တႃႇတေၵေႃႇသၢင်ႈ ၽေႃးထိၵျူဝ်ႇပႅတ်ႇလုၵ်ႈ။
ၸဝ်ႈသြႃႇသုၶမ်း ႁေႃးလၢတ်ႈလွင်ႈဝၼ်းလိူၼ်ႁူၵ်းမူၼ်း မဵတ်ႉတႃႇတြႃးယၢတ်ႇၼမ်ႉပၼ် ၸဝ်ႈတႃႇၼ ဢၼ်လႆႈမႃးလူႇတၢၼ်း ၵွင်းမူးမၢၵ်ႇႁိၼ်ၼမ်ႉ၊ ၸရွပ်ႈသႃႇလႃး၊ လၵ်းသဝ်တုင်း၊ သဵၼ်ႈတၢင်းၶွၼ်ႇၵရိၵ်ႉ ဢၼ်ၶိုၼ်ႈမႃးၸူး ၵွင်းမူးမၢၵ်ႇႁိၼ်ၼမ်ႉၵႂႃႇယဝ်ႉ။ ဝၢႆးၼၼ်ႉ ဢွၼ်ၵၼ် ယၢတ်ႇၼမ်ႉ ၸႅၵ်ႇၽႄၵုသူဝ်ႇ ၵၼ်ႇတေႃးလူပ်းသေ ပၢင်ၵႅဝ်ႈယဝ်ႉတူဝ်ႈၵႂႃႇ။
