ပွႆးဝၼ်းၵိူတ်ႇ ၶူးဝႃးဝုၼ်းၸုမ်ႉ ပီ 2026
ဝၼ်းဢႃးတိတ်ႉ၊ ၸၼ်ႇဝႃႇရီႇ 4၊ 2026
.jpg)
ၸဝ်ႈသိၼ်ထမ်းဝုၼ်းၸုမ်ႉၼႆႉ ၵိူတ်ႇၺႃး ၼႂ်းလိူၼ်ၵျၼ်ႇၼဝရီႇ 5 ဝၼ်းလႄႈ ပၢင်ၵႅဝ်ႈဝၼ်းၵိူတ်ႇၸဝ်ႈၵေႃႈ ၸတ်းႁဵတ်းၵႂႃႇ ဝၼ်းၼၼ်ႉ ၵူႈပီပီသေ ပီၼႆႉ ၶွပ်ႈၶူပ်ႇၶွႆႈထိုင်မႃး 62 ပီယူႇယဝ်ႉ။ ဢွင်ႈတီႈ ၸတ်းႁဵတ်းဝၼ်းၵိူတ်ႇၸဝ်ႈတႄႉ ပဵၼ်တီႈၸႄႈတွၼ်ႈတႃႈၶီႈလဵၵ်း ဢိူင်ႇမိူင်းၽူင်း ဝၢၼ်ႈပႃႇသႃ တမ်ႈတီႈ ထၢတ်ႈရွၼ်းရိူင်း (တွၼ်းႁိူင်း)ၼၼ်ႉသေ တၢင်ႇတီႈတၢင်ႇဝဵင်းၵေႃႈ ဝၼ်းၵျၼ်ႇၼဝရီႇ 5 ဝၼ်းၼၼ်ႉ တၵႃႇၶဝ် ဢွၼ်ၵၼ် ၸတ်းႁဵတ်းပၼ် ဝၼ်းၵိူတ်ႇၶူးဝႃးၵႂႃႇယူႇ။
တႃႇၸတ်းႁဵတ်း ဝၼ်းၵိူတ်ႇၶူးဝႃးဝုၼ်းၸုမ်ႉ ပီ 2026 ၼႆႉ လႆႈဢွၼ်ၵၼ်ႁၢင်ႈႁႅင်းဝႆႉ ၸိူင်ႉၼင်ႇၵူႈပီပီသေ တၵႃႇတီႈၸမ်တီႈၵႆ ဢွၼ်ၵၼ်ႁွတ်ႈထိုင် တီႈမိူင်းၽူင်း ၸိုၵ်ႉၸိုၵ်ႉသၢႆသၢႆဝႆႉယူႇ။ ၸဝ်ႈၶူးဝႃးဝုၼ်းၸုမ်ႉတႄႉ မိူဝ်ႈဝၼ်းထိ (2.1.2026) လႆႈလုၵ်ႉဢဝ် တီႈမိူင်းလႃးသေ ႁွတ်ႈထိုင်မႃး တႃႈၶီႈလဵၵ်း မိူင်းၽူင်း ၶၢဝ်းယၢမ်းဝၢႆးဝၼ်း 4 မွင်းလိူဝ်သေ ထိုင်မႃး ၵၢင်ၶမ်ႈ 6:30 တေႃႇ 10:00 ပၢႆ ၵႅၼ်ႇၸဝ်ႈဝႆႈၽြႃးႁေႃးတြႃး တမ်ႈတီႈ ၼိူဝ်ၶဵင်ႇႁေႃးထမ်း ဢွင်ႈတီႈႁၢင်ႈႁႅၼ်းဝႆႉ ၼႂ်းသူၼ်မွၵ်ႇၼၼ်ႉၵႂႃႇယဝ်ႉ။
(3.1.2026) ၵၢင်ၼႂ် ၸုမ်းဝေႇယႃႇဝတ်ႉၸၶဝ် ႁၢင်ႈႁႅၼ်း သွမ်းၼႂ်/သွမ်းဝၼ်း လူႇတၢၼ်းသင်ႇၶႃႇၸဝ်ႈၶဝ် ၸိူဝ်းမႃး ပွႆးဝၼ်းၵိူတ်ႇ၊ ၸုမ်းလဵင်ႉလူၵေႃႈ ႁၢင်ႈႁႅၼ်းဝႆႉပၼ် တႃႇပီႈၼွင်ႉမႃးပွႆး လႆႈၵိၼ်ၶဝ်ႈၽွႆ ၶဝ်ႈၼႂ်၊ ၸိူဝ်းမႃး ႁဵတ်းၵၢတ်ႇဝဵင်းၶမ်းၵေႃႈ လႃႈႁႅၼ်းဝႆႉသေ ဢွၼ်ၵၼ်ၵႂႃႇႁႃၵိၼ်သုင်း သိုဝ်ႈၽႂ်တၼ်းမၼ်းၵႂႃႇ။ ဝၼ်းၼၼ်ႉ ၶူးဝႃးဝုၼ်းၸုမ်ႉ ၵႂႃႇယၢတ်ႈၼမ်ႉပၼ် တမ်ႈတီႈ ၶုၼ်ပႃႇႁဵဝ်ႈ မႄႈသႅင်လႃႈ၊ ၵႂႃႇယဵမ်ႈတူၺ်း ဢွင်ႈတီႈ တေဝႆႉၶုမ်ၵုတ်း (ဢွင်ႈဝႆႉၶၢပ်ႈတူဝ်ၸဝ်ႈ ပေႃးလွၼ်ႇမႃး) ၼၼ်ႉသေ ပိုၼ်ၽႄႈမဵတ်ႉတႃႇပၼ်ၵႂႃႇ။ လိူဝ်သေၼၼ်ႉ ၵႂႃႇယၢတ်ႇၼမ်ႉပၼ် တမ်ႈတီႈ ႁေႃသၢမ်ၸၼ်ႉ ဢိၵ်ႇလၢႆလၢႆတီႈသေ ထိုင်မႃး ႁူဝ်ၶမ်ႈ 6 မွင်းပၢႆ တေႃႇထိုင် 10 ၵၢင်ၶမ်ႈၵေႃႈ သိုပ်ႇႁေႃးတြႃးပၼ် ပရိသတ်ႈၸိူဝ်းမႃးပွႆးဝၼ်းၵိူတ်ႇၼၼ်ႉယဝ်ႉ။
ပၢင်ၵႅဝ်ႈဝၼ်းၵိူတ်ႇၸဝ်ႈ တေသိုပ်ႇႁဵတ်းၵႂႃႇ တေႃႇထိုင် 5.1.2026 ၶၢဝ်ႇငၢဝ်း မီးၼင်ႇၼႆ။
ႁွင်ႈၼႄပၢႆးမွၼ်း
ၶႅပ်းႁၢင်ႈမၢႆတွင်း ပွႆးဝၼ်းၵိူတ်ႇ ၶူးဝႃးဝုၼ်းၸုမ်ႉ ပီ 2026
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]
