ပွႆးတၢင်ႇၸွင်ႈပီသႅင် ၵွင်းမူးႁၢင်းသႃႇၶမ်း တၢင်ႉယၢၼ်း
ဝၼ်းဢင်းၵၢၼ်း၊ ၸုၼ်ႇ 10၊ 2025
၁၃၈၇ ဝၼ်းလိူၼ်ၸဵတ်းမူၼ်း ဝၼ်းမႁႃသမယ ၶၢဝ်းယၢမ်းၵၢင်ၼႂ် 9 မွင်းပၢႆ ၸဝ်ႈသြႃႇသုၶမ်း ဢွၼ်ႁူဝ်သေ မႄးတၢင်ႇၸွင်ႈပီသႅင် ၵွင်းမူးႁၢင်းသႃႇၶမ်း ဢၼ်ၸဝ်ႈၼင်ႈၵျွင်းဢွင်ႇမင်ႇၵလႃႇ ၸဝ်ႈသြႃႇဝိရိယလႄႈ တၵႃႇဢွၼ်ၵၼ်မႄးၵုမ်းဝႆႉၼၼ်ႉ ယဝ်ႉတူဝ်ႈၵႂႃႇလီငၢမ်းယူႇယဝ်ႉ။
ၵွင်းမူးႁၢင်းသႃႇၶမ်းၼႆႉ ပဵၼ်ၵွင်းမူးၵိုၵ်းပိုၼ်း ၼေႃႇလွင်းၽြႃးၵေႃးတမ ဢၼ်လႆႈပဵၼ် ပဵတ်းၶမ်းၼူၵ်ႉႁၢင်းသႃႇ ယူႇသဝ်းၵိၼ်သၢင်ႈလူၺ်ႈ ၼွင်ၵဝ်ႈၼွင်၊ လူင်ၵဝ်ႈလူင်၊ ၼႃးၵဝ်ႈၼႃး လွတ်ႈၽေးၶဵၼ် ၵတ်းၸိုၼ်ႈယဵၼ်ၸႂ် တေႃႇၸူဝ်ႈသုတ်းပၢၼ် ၸၢတ်ႈၼိုင်ႈယဝ်ႉ။
ဢဝ်ၸွမ်းၼင်ႇပိုၼ်းဝႃႈၸိုင် ၶုၼ်ဢလွင်းၸီႇသူႇ ၶီႇႁိူဝ်းမႃး လႆႈမႃးႁူႉႁၼ် လုပ်ႇပဵတ်းၶမ်းႁၢင်းသႃႇ မီးဝႆႉ တီႈၼႆႈလႄႈ ၸင်ႇမႃးတႄႇပဵၼ် ထၢတ်ႈၵွင်းမူးဝႆႉယဝ်ႉ။ ဝၢႆးၼၼ်ႉ ၶုၼ်ႁေႃၶမ်း မိူင်းထႆး လႆႈမႃးၵုမ်းလုမ်းလႃး ႁဵတ်းႁႂ်ႈယႂ်ႇသုင်သေၵဝ်ႇ။
ထိုင်မႃး ပီၵေႃးၸႃႇ ၁၃၃၉ (1977) ယွၼ်ႉလူမ်းလႅင်ႉလူင်ပတ်ႉလႄႈ ၵွင်းမူးလူင် လႆႈပုတ်းႁၵ်းၶၢတ်ႇၵၢင်ၵႂႃႇ။ ယွၼ်ႉၼၼ် ၸဝ်ႈသြႃႇတေႃႇဢူးၸီး ၵျွင်းလူင်ဢွင်ႇမင်ႇၵလႃႇလႄႈ သြႃႇၵမ်ႇမထၢၼ်း ဢူးလသူၺ်ႇ ၶိုၼ်းမႄးၵုမ်း ႁဵတ်းပဵၼ်ထီးဢုတ်ႇ ၶပ်ႉမၢၼ်ႇလူႇတၢၼ်းၵႂႃႇယဝ်ႉ။
ပီယၢဝ်းၶၢဝ်းႁိုင်မႃး ၵွင်းမူးလူင်ၵေႃႈ ၵဝ်ႇၵႄႇမႃးလႄႈ ထိုင်မႃး ပၢၼ်ၸဝ်ႈသြႃႇပၺ်ႇၺႃႇၽေႃးၵ ပဵၼ်ၽူႈၼင်ႈၵျွင်းၼၼ်ႉ လႆႈမႄးတၢင်ႇထီး မိူဝ်ႈပီၶရိတ်ႉ 1998 ၼၼ်ႉယဝ်ႉ။
ထိုင်မႃး ပီၶရိတ်ႉ 2024 ယွၼ်ႉလူမ်းလႅင်ႉလူင်ပတ်ႉလႄႈ ထီးၵွင်းမူး လႆႈၶိုၼ်းၵိူင်းၸၢႆႉၵႂႃႇသေ ၸင်ႇလႆႈပူတ်းလူင်းထီးၵဝ်ႇ မႄးတၢင်ႇၶိုၼ်း ထီးမႂ်ႇ ၸွင်ႈလႄႈပီသႅင် မိူဝ်ႈ 10.6.2025 ဝၼ်း လိူၼ်ၸဵတ်းမူၼ်းၼႆႉယဝ်ႉ။
📸 ၶႅပ်းႁၢင်ႈမၢႆတွင်း ပွႆးတၢင်ႇၸွင်ႈပီသႅင် ၵွင်းမူးႁၢင်းသႃႇၶမ်း တၢင်ႉယၢၼ်း
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]
