ထိမ်ႇၶုၵ်ႉ တေထွၼ်တူဝ်ဢွၵ်ႇ တီႈၼႃႈတီႈ ၽူႈၼမ်းၵၢၼ် (CEO) ဢႅပ်ႉပႄးလ်
ဝၼ်းဢင်းၵၢၼ်း၊ ဢေႇပရႄႇ 21၊ 2026
.jpg)
ထိမ်ႇၶုၵ်ႉ တေထွၼ်တူဝ်ဢွၵ်ႇ တီႈၼႃႈတီႈ CEO ၶွမ်ႇပၼီႇ Apple ၼၼ်ႉယဝ်ႉ။
ၼႂ်းလိၵ်ႈဢၼ်ပိုၼ်ၽႄႈ တီႈၵူၼ်းတင်းၼမ် မိူဝ်ႈဝၼ်းၸၼ်ၼၼ်ႉ ထိမ်ႇၶုၵ်ႉ လၢတ်ႈဝႃႈ တႄႇၼႂ်းလိူၼ်သႅပ်ႇထႅမ်ႇပႃႇၼႆႉၵႂႃႇ ဢႅပ်ႉပႄးလ် တေမီးၽူႈၼမ်းၵၢၼ်မႂ်ႇ ဝႃႈၼႆယဝ်ႉ။
ထိမ်ႇၶုၵ်ႉ ဢႃႇယု 65 ပီ လၢတ်ႈဝႃႈ "ၵဝ်ၶႃႈ တေလႅၵ်ႈလၢႆႈၵႂႃႇႁဵတ်း ၼႃႈၵၢၼ်မႂ်ႇ၊ တေဝၢင်း ၼႃႈတီႈ ၽူႈၼမ်းၵၢၼ် (CEO) ၵႂႃႇ ၼႂ်းလိူၼ်သႅပ်ႇထႅမ်ႇပႃႇသေ တေသိုပ်ႇႁပ်ႉဢဝ်ၼႃႈၵၢၼ် ပဵၼ်ႁူဝ်ပဝ်ႈၽၢႆႇပွင်ၵၢၼ် (Executive Chairman) ၶွင် ဢႅပ်ႉပႄးလ်ဢေႃႈ" ဝႃႈၼႆ။
ထိမ်ႇၶုၵ်ႉ မၢႆထႅမ်ဝႃႈ ၽူႈၼမ်းၵၢၼ် (CEO) ၵေႃႉမႂ်ႇၶွင် ၶမ်ႇပၼီႇၼၼ်ႉ တေပဵၼ် ၵျွၼ်ႇထႃႇၼတ်ႉသ် (John Ternus)၊ ဢၼ်ပဵၼ် ၽူႈၵေႃႇသၢင်ႈပၢႆးၸၢင်ႈ (Engineer) ၵေႃႉဢၼ်ႁဵတ်းၵၢၼ်ၸွမ်း ဢႅပ်ႉပႄးလ် မႃးႁိုင် 25 ပီယဝ်ႉ။ ၸွမ်းၼင်ႇ ဝႅပ်ႉသၢႆႉ ဢႅပ်ႉပႄးလ် ၼႄဝႆႉၼၼ်ႉၸိုင် ထႃႇၼတ်ႉသ် လႆႈပဵၼ် ၽူႈၵုမ်းၵမ် ၽၢႆႇၵေႃႇသၢင်ႈပၢႆးၸၢင်ႈ ၶိူင်ႈပၢႆးၸၢင်ႈ (Hardware Engineering) ၼိူဝ်ၶိူင်ႈၵူႈလၢႆလၢႆဢၼ် ၶွင်ၶမ်ႇပၼီႇ၊ ၼႂ်းၼၼ်ႉၶဝ်ႈပႃး ဢၢႆႇၽႅတ်ႉ (iPads) လႄႈ ဢႄးၽွတ်ႉသ် (AirPods)၊ မႅၵ်ႉ (Macs)၊ ဢႅပ်ႉပႄးလ် ဝွတ်ႉၶျ် (Apple Watch) လႄႈ ဢၢႆႇၾူၼ်း (iPhone) ၶႃႈ။
ၵျူဝ်ႇ-ဢႄးလႅၼ်း ပူဝ်ႇၸ်ၼႃႇ (Jo-Ellen Pozner)၊ ၵေႃႉပဵၼ်ၵႅမ်ၶူးသွၼ်လူင် တီႈႁူင်းႁဵၼ်းပၢႆးမၢၵ်ႈမီး ၸၼ်ႉၸွမ်သၼ်ႇထႃႇၵလႃႇရႃႇ လၢတ်ႈဝႃႈ "ၵဝ်ၶႃႈထၢင်ႇဝႃႈ ၼႆႉပဵၼ်ဢၼ်ၸႅင်ႈလႅင်းဝႃႈ ႁဝ်းတေတိူဝ်းသႂ်ႇႁႅင်းႁဵတ်း ၽၢႆႇၶိူင်ႈပၢႆးၸၢင်ႈ (Hardware) တႄႉတႄႉယဝ်ႉ။ ပေႃးတေလၢတ်ႈသိုဝ်ႈသိုဝ်ႈၵေႃႈ ၽၢႆႇႁဵတ်းၶိူင်ႈပၢႆးၸၢင်ႈၼၼ်ႉ ပဵၼ်ဢၼ်ဢွင်ႇမၢၼ်မႃး တႄႉတႄႉဝႃႈဝႃႈၶႃႈလူး"။
ထိမ်ႇၶုၵ်ႉ လႆႈသိုပ်ႇႁပ်ႉဢဝ်ၼႃႈၵၢၼ်လူင်ၼႆႉ တီႈၽူႈၵေႃႇတင်ႈ ဢႅပ်ႉပႄးလ် ၵေႃႉဢၼ်မီးတၢင်းမုင်ႈႁၼ်ၵႆ ၸိုဝ်ႈဝႃႈ သတိပ်ႉၵျွပ်ႉသ် (Steve Jobs) ၼၼ်ႉၶႃႈ။ လၢႆလၢႆလၢႆးၸိုင် ထိမ်ႇၶုၵ်ႉ ၼႆႉ ပႅၵ်ႇပိူင်ႈၵၼ်တင်း လၢႆးၼမ်းၵၢၼ် ဢၼ်မီးႁႅင်းၸၼ်ၸႂ်ၶွင် ၵျွပ်ႉသ် ဝႆႉယူႇ၊ မၼ်းၸဝ်ႈသၢင်ႈပိုၼ်းတႃႇတူဝ်မၼ်းၸဝ်ႈ ၼင်ႇပဵၼ်ၽူႈၼမ်း ၵေႃႉဢၼ်ၸႂ်ၵတ်းၸႂ်ယဵၼ် လႄႈ ဢၼ်ဢူၼ်ႈဢွၼ်ႇလႄႈ လႆႈမီးၸိုဝ်ႈသဵင်လီမႃး။
ထိမ်ႇၶုၵ်ႉ လႆႈၸႂ်ႉတိုဝ်း တူဝ်ထူပ်း ၽၢႆႇၸတ်းၵၢၼ် (Operations) ၶွင်မၼ်းၸဝ်ႈသေ လႆႈၶႂၢၵ်ႈလႄႈ လႅၵ်ႈလၢႆႈ သၢႆၸိူၵ်ႈၵၢၼ်သူင်ႇၶူဝ်း (Supply chains) တင်းၼမ်၊ တင်းတႄႇႁဵတ်းဢွၵ်ႇ ၶိူင်ႈၶျိပ်ႉ (Chips) ဢၼ်ဢႅပ်ႉပႄးလ် တႅမ်ႈလွၵ်းလၢႆးမၼ်းႁင်းၵူၺ်း တွၼ်ႈတႃႇၸႂ်ႉၼႂ်းၶိူင်ႈၶွင်ၶမ်ႇပၼီႇၼၼ်ႉယဝ်ႉ။
ထိမ်ႇၶုၵ်ႉ ယင်းလႆႈၼမ်းၼႃႈ ဢႅပ်ႉပႄးလ် ၶႂၢၵ်ႈၼႃႈၵၢၼ်လိူဝ်သေ ၵၢၼ်ႁဵတ်းၶိူင်ႈပၢႆးၸၢင်ႈ (Hardware) သေ ၶဝ်ႈၸူးၽၢႆႇၵၢၼ်ၸွႆႈသၢင်ႈ (Services)၊ တင်းလႆႈပိုတ်ႇပွႆႇဢွၵ်ႇ ၶူဝ်းၵုၼ်ႇၸႂ်ႉတိုဝ်း တိတ်းတၢမ်းၸွမ်းလိူၼ် (Subscription products) တင်းၼမ် ၼင်ႇပဵၼ် ဢႅပ်ႉပႄးလ် ၼိဝ်းသ် (Apple News)၊ ဢႅပ်ႉပႄႇလ် တီႇဝီႇ (Apple TV) လႄႈ ဢႅပ်ႉပႄႇလ် ပေး (Apple Pay) ၸိူဝ်းၼႆႉ။ မိူဝ်ႈၼႆႉၸိုင် ၵၢၼ်ၸွႆႈသၢင်ႈၸိူဝ်းၼၼ်ႉ ပဵၼ်သၢႆငိုၼ်းၶဝ်ႈဢၼ်ယႂ်ႇလူင် တွၼ်ႈတႃႇၶမ်ႇပၼီႇယဝ်ႉ။
ၼႂ်းၶၢဝ်းတၢင်း ဢၼ်မၼ်းၸဝ်ႈႁၢပ်ႇၼႃႈၵၢၼ် CEO ၼၼ်ႉ၊ ဢႅပ်ႉပႄးလ် လႆႈၵုမ်းၵမ် တီႈလွၵ်းၵၢတ်ႇသမၢတ်ႉၾူၼ်း (Smartphone) တူဝ်ႈလူၵ်ႈ လူၺ်ႈဢၢႆႇၾူၼ်း (iPhone) လႄႈ ၵႃႈၶၼ်ၶမ်ႇပၼီႇၵေႃႈ လႆႈသုင်ၶိုၼ်ႈႁႅင်းတႄႉတႄႉ တေႃႇပေႃးထိုင် $4 ထြီႇလီႇယႅၼ်ႇ (Trillion) ၼႂ်းဝၼ်းမိူဝ်ႈၼႆႉယဝ်ႉ။
ထိမ်ႇၶုၵ်ႉ ယင်းပဵၼ် CEO ၵေႃႉဢွၼ်တၢင်းသုတ်း ၼႂ်းၶမ်ႇပၼီႇ ၾေႃႇၵျုၼ်း 500 (Fortune 500) ဢၼ်လႆႈပိုၼ်ၽႄႈ တႅမ်ႈလိၵ်ႈသပ်းလႅင်း လွင်ႈတူဝ်မၼ်းၸဝ်ႈ မိူဝ်ႈ ပီ 2014 ဝႃႈ ပဵၼ်ၵူၼ်းႁၵ်ႉၸၢတ်ႈလဵဝ်ၵၼ် (Gay) ၼႆၶႃႈ။ လွင်ႈၼႆႉ လႆႈႁပ်ႉၵၢၼ်ယွင်ႈယေႃးဝႃႈ ပဵၼ်ၶၢဝ်းယၢမ်း ဢၼ်လီႁပ်ႉတွၼ်ႈတႄႉတႄႉ၊ ယွၼ်ႉ CEO ဢၼ်မီးၸိုဝ်ႈသဵင်လူင်ၸိူင်ႉၼႆ လႆႈဢွၵ်ႇသဵင်ၸွႆႈထႅမ် လႄႈ ပဵၼ်တူဝ်ယၢင်ႇလီ (Role model) တွၼ်ႈတႃႇၸုမ်းၵူၼ်းၼုမ်ႇ LGBTQ ၶဝ်ယဝ်ႉ။
ၼႂ်းလိၵ်ႈဢၼ်မၼ်းၸဝ်ႈတႅမ်ႈၸူး တူင်ႇဝူင်းၵူၼ်းၸႂ်ႉ ဢႅပ်ႉပႄးလ် မိူဝ်ႈဝၼ်းၸၼ်ၼၼ်ႉ၊ ထိမ်ႇၶုၵ်ႉ လႆႈတႅမ်ႈၼႄလွင်ႈတၢင်းသုၼ်ႇတူဝ် ၵဵဝ်ႇလူၺ်ႈၶၢဝ်းယၢမ်းမၼ်းၸဝ်ႈ တီႈဢႅပ်ႉပႄးလ် လႄႈ လွင်ႈဝႃႈ မၼ်းၸဝ်ႈႁၵ်ႉႁွမ်ၼပ်ႉထိုဝ် ၵၢၼ်တႄႇတင်ႈမိူဝ်ႈၸဝ်ႉ ၼႂ်းၶၢဝ်းတၢင်း 15 ပီ ပူၼ်ႉမႃး မိူၼ်ၼင်ႇ တႃႇပိုတ်ႇဢီးမေးလ် (Email) သေ ဢၢၼ်ႇလိၵ်ႈ ဢၼ်ၽူႈၸႂ်ႉတိုဝ်း ဢႅပ်ႉပႄးလ် သူင်ႇမႃးၼၼ်ႉတႄႉတႄႉၶႃႈ။ လိၵ်ႈၸိူဝ်းၼၼ်ႉ လၢတ်ႈၼႄဝႃႈ ၶူဝ်းၵုၼ်ႇၶမ်ႇပၼီႇ လႆႈၸွႆႈထႅမ်ပၼ် ထိုင်ၼႂ်းပိုၼ်းၸူဝ်ႈပၢၼ်ၶဝ် ၸိူင်ႉၼင်ႇ "ႁၢင်ႈသႄႇလ်ၾီႇ (Selfie) ဢၼ်ႁၢင်ႈလီလိူဝ်ပိူၼ်ႈ ဢၼ်ၸဝ်ႈၵဝ်ႇထၢႆႇလႆႈ တီႈၸိၵ်းလွႆ သုင်သုင် ဢၼ်မိူၼ်ၼင်ႇ တေဢမ်ႇၶိုၼ်ႈလႆႈၼၼ်ႉ" တေႃႇပေႃးထိုင် လွင်ႈမႄႈၵေႃႉၼိုင်ႈ "ဢၼ်လႆႈလွတ်ႈၽေးလူၺ်ႈ ဢႅပ်ႉပႄးလ် ဝွတ်ႉၶျ် (Apple Watch)" ၼၼ်ႉၶႃႈ။
မၼ်းၸဝ်ႈလၢတ်ႈဝႃႈ မၼ်းၸဝ်ႈပဵၼ်ဢၼ်ယိၼ်းၸူမ်းၶွပ်ႈၸႂ်တႄႉတႄႉ ဢၼ်လႆႈပဵၼ် ၽူႈၼမ်းၶွင်ၶမ်ႇပၼီႇ ဢၼ်ၸွႆႈပူၵ်းတိုၼ်ႇပၼ် လွင်ႈဝူၼ်ႉသၢင်ႈ လႄႈ ၸွႆႈႁဵတ်းႁႂ်ႈၸူဝ်ႈပၢၼ်ၵူၼ်း မီးၵႃႈၶၼ်သုင်ၶိုၼ်ႈ ၼႂ်းလၢႆးတၢင်းဢၼ်လိုၵ်ႉလမ်ႇတႄႉတႄႉ တေႃႇပေႃးဢမ်ႇၸၢင်ႈဢဝ်ၶေႃႈၵႂၢမ်းမႃးသပ်းလႅင်းလႆႈၼၼ်ႉၼႆယဝ်ႉ။
ငိူၼ်ႈငဝ်ႈၶၢဝ်ႇ
- Kali Hays and Dearbail Jordan. "New era as Apple names new boss to replace Tim Cook after 15 years" — BBC News, April 21, 2026
- Ichael Liedtke. "Tim Cook will step down as Apple CEO and hand reins over to the iPhone maker’s hardware leader" — AP News, April 21, 2026
- Rolfe Winkler. "Tim Cook to Step Down as Apple Names New CEO" — The Wall Street Journal, April 20, 2026
- John Ruwitch. "Tim Cook to step down as Apple CEO. In letter, describes 15 years of emails" — NPR, April 20, 2026