Jump to content

ထရမ်ႉ ထုၵ်ႇလႆႈသူးၼူဝ်ႇပႄႇလ် ပေႃးႁႄႉႁၢမ်ႈလႆႈ ၶႄႇ ဢမ်ႇၸႂ်ႉဢဵၼ်ႁႅင်းတေႃႇ မိူင်းထၢႆႇဝၢၼ်း

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းဢင်းၵၢၼ်း၊ ဢွၵ်ႇထူဝ်ႇပႃႇ 7၊ 2025

ၸွမ်ပွင်ၸိုင်ႈ ထၢႆႇဝၢၼ်း

ၸွမ်ပွင်ၸိုင်ႈ ဢမႄႇရိၵၢၼ်ႇ တေႃႇၼႄႇထရမ်ႉ ထုၵ်ႇလီလႆႈသူးငမ်းယဵၼ် ၼူဝ်ႇပႄႇလ် သင်ဝႃႈ မၼ်းၸၢင်ႈ ႁဵတ်းႁႂ်ႈ ၸွမ်ပွင်ၸိုင်ႈၶႄႇ သျီႇၸိင်းပိင်ႇ ယွမ်းၵၢၼ်ႉ လွင်ႈဢၼ်တေၸႂ်ႉတိုဝ်း ဢဵၼ်ႁႅင်း သၢၼ်ၶတ်းတေႃႇ မိူင်းထၢႆႇဝၢၼ်းၼႆ ၸွမ်ပွင်ၸိုင်ႈ လၢႆႇၶျိင်းတႄႇ လၢတ်ႈတီႈ ႁူင်းပွႆႇသဵင် လႄႈ ၽွတ်ႉၶႅတ်ႉ ဢၼ်ၵမ်ႉထႅမ် ပၢႆးဝူၼ်ႉၵဝ်ႇ ဢမႄႇရိၵၢၼ်ႇ မိူဝ်ႈတွင်ႈထၢမ်မၼ်းၼၼ်ႉယဝ်ႉ။

ဢမႄႇရိၵၢၼ်ႇၼႆႉ ပဵၼ်မိူင်း ဢၼ်ၶႄႇ လၢတ်ႈဝႃႈ ပဵၼ်မိူင်းဢၼ်ၵမ်ႉထႅမ် မိူင်းထၢႆႇဝၢၼ်း ဢၼ်လမ်ႇလွင်ႈလိူဝ်ပိူၼ်ႈ ၼႂ်းလုမ်ႈၾႃႉၼႆသေတႃႉ ဢမ်ႇမီးလွင်ႈၵပ်းသိုပ်ႇ ဢၼ်ပဵၼ်တၢင်းၵၢၼ်သေတႃႉ တႄႇဢဝ် ၸွမ်ပွင်ၸိုင်ႈ တေႃႇၼႄႇထရမ်ႉ ၶိုၼ်ႈႁၢပ်ႇၵၢၼ် မိူဝ်ႈႁူဝ်ပီၼႆႉမႃးၼၼ်ႉ မၼ်းဢမ်ႇပိုၼ်ၽၢဝ်ႇ လွင်ႈၶၢႆၵွင်ႈၵၢင်ႇမႂ်ႇ ၸူးတီႈၵုၼ်ၼၼ်ႉ။

ထရမ်ႉ တေၸၢင်ႈႁူပ်ႉထူပ်း သျီႇ တီႈပၢင်ၵုမ် ၽူႈဢွၼ်ႁူဝ် ဢေးသျႃး-ပၸိၽိၵ်ႉ ဢၼ်တေၸတ်းႁဵတ်း တီႈမိူင်းၵၢဝ်းလီၸၢၼ်း ၼႂ်းဝၢႆးလင်လိူၼ်ၼႆႉယူႇ။

မိူဝ်ႈဝူင်ႈၼႆႉ လႆၢး လၢတ်ႈတီႈ ႁူင်းပွႆႇသဵင် The Clay Travis and Buck Sexton Show ဢၼ်ပွႆႇၼႄ တီႈႁူင်းပွႆႇသဵင် ဢုပ်ႇဢူဝ်း 400 လိူဝ်ၼၼ်ႉ မၼ်းယိူင်းၸူး ၶေႃႈၵႂၢမ်း ဢၼ်ထရမ်ႉ လၢတ်ႈမိူဝ်ႈလိူၼ်ဢေႃးၵၢတ်ႉၼၼ်ႉသေ မၼ်းလၢတ်ႈဝႃႈ မိူဝ်ႈမၼ်းပဵၼ် ၸွမ်ပွင်ၸိုင်ႈ ဢမႄႇရိၵၢၼ်ႇၼၼ်ႉ ၶႄႇတေဢမ်ႇၶဝ်ႈတိုၵ်း မိူင်းထၢႆႇဝၢၼ်း ဝႃႈၼႆယဝ်ႉ။

လႆၢး လၢတ်ႈဝႃႈ “ႁဝ်းၶႃႈ မုင်ႈမွင်းဝႃႈ တေသိုပ်ႇလႆႈ လွင်ႈၵမ်ႉထႅမ် ၸွမ်ပွင်ၸိုင်ႈထရမ်ႉယူႇ။ ပေႃး ၸွမ်ပွင်ၸိုင်ႈထရမ်ႉ ထုၵ်ႇတိုၵ်းသူၼ်း သျီႇၸိင်းပိင်ႇ တႃႇႁႂ်ႈပွႆႇၽႃႈတေႃႇၸူဝ်ႈ လွင်ႈဢၼ်ဝႃႈ တေဢဝ်ႁႅင်းသိုၵ်းသေ ပူၼ်ႉပႅၼ် ထၢႆႇဝၢၼ်း ၼႆ ၸွမ်ပွင်ၸိုင်ႈထရမ်ႉ ၵိုင်ႇလႆႈ သူးၼူဝ်ႇပႄႇလ် ဝႃႈၼႆယဝ်ႉ။

ထရမ်ႉ လၢတ်ႈဝႃႈ မၼ်းထုၵ်ႇလီလႆႈ လွင်ႈယွင်ႈယေႃး ဢၼ်ပၼ် တီႈႁိူၼ်းႁေႃၶၢဝ် 4 ၵေႃႉ ဢၼ်မႃးဢွၼ်တၢင်းမၼ်းၼၼ်ႉၼႆယဝ်ႉ။ သူးပီၼႆႉ တေပိုၼ်ၽၢဝ်ႇ တီႈမိူင်းၼေႃႇဝေး ၼႂ်းဝၼ်းသုၵ်းၼႆႉ ၼႆယဝ်ႉ။

မိူဝ်ႈတွင်ႈထၢမ်ဝႃႈ သင်ဝႃႈ တေႁူပ်ႉထူပ်း ၸွမ်ပွင်ၸိုင်ႈဢမႄႇရိၵၢၼ်ႇၼႆၸိုင် တေလၢတ်ႈသင်ၼႆၼၼ်ႉ လၢႆႇ လၢတ်ႈဝႃႈ တေပၼ်တၢင်းႁၼ်ထိုင် ႁႂ်ႈထရမ်ႉ သႂ်ႇၸႂ်ၼိူဝ် လွင်ႈႁဵတ်းသၢင်ႈ သျီႇၼၼ်ႉယူႇ။

ၸွမ်းၼင်ႇ ၶေႃႈမုၼ်း ဢၼ်လုမ်းၸွမ်ၸိုင်ႈ ပိုၼ်ၽၢဝ်ႇဢွၵ်ႇ မိူဝ်ႈဝၼ်းဢင်းၵၢၼ်းၼၼ်ႉ လၢႆႇ လၢတ်ႈဝႃႈ “ ၵဝ်ၶႃႈ တေပၼ်တၢင်းႁၼ်ထိုင် မၼ်းဝႃႈ ႁႂ်ႈမၼ်း သႂ်ႇၸႂ် လွင်ႈဢၼ် သျီႇၸိင်းပိင်ႇ ႁဵတ်းပၢင်ၽိုၵ်းၽွၼ်ႉ သိုၵ်း ယႂ်ႇလူင် တီႈသၢႆၼမ်ႉ မိူင်းထၢႆႇဝၢၼ်း ၼမ်မႃးတိၵ်းတိၵ်းၼၼ်ႉၵွႆးဢမ်ႇၵႃး မၼ်းၶႂၢၵ်ႈႁႅင်းသိုၵ်း တီႈပၢင်ႇလၢႆႇၶႄႇပွတ်းဢွၵ်ႇ လႄႈ ပၢင်ႇလၢႆႇၶႄႇပွတ်းၸၢၼ်း“ ၼႆယဝ်ႉ။

ဝၢႆးသေ ၶေႃႈမုၼ်း ပိုၼ်ၽၢဝ်ႇဢွၵ်ႇမႃး လၢႆၸူဝ်ႈမူင်းယဝ်ႉ ၽၢႆႇၵႅတ်ႇၶႄ မိူင်းထၢႆႇဝၢၼ်း ပိုၼ်ၽၢဝ်ႇဝႃႈ လႆႈႁၼ် လွင်ႈတူင်ႉၼိုင် သိုၵ်းၶႄႇ ၼမ်မႃးထႅင်ႈသေ ႁိူဝ်းမိၼ်သိုၵ်း လႄႈ ႁိူဝ်းမိၼ် ဢမ်ႇပႃးၵူၼ်း 23 လမ်း ဢဝ်ႁိူဝ်းသိုၵ်းၶႄႇ ႁူမ်ႈၵၼ် လဵပ်ႈႁဵၼ်း ႁၢင်ႈႁႅၼ်းသိုၵ်း ၸွမ်းၵုၼ်ၼၼ်ႉၼႆယဝ်ႉ။

လွင်ႈဢၼ်ၶႄႇ လုၵ်ႉတီႈၽင်ႇပၢင်ႇလၢႆႇတူဝ်ၵဝ်ႇသေ ႁဵတ်းၵၢၼ်သိုၵ်း ၼမ်မႃးတိၵ်းတိၵ်းၼၼ်ႉ ဢမ်ႇၸႂ်ႈဝႃႈ ပဵၼ်လွင်ႈၶဵင်ႇတႃႉ တႃႇမိူင်းထၢႆႇဝၢၼ်း ၵူၺ်း ၼႆ လႆၢး လၢတ်ႈၼႄၼင်ႇၼႆ။

လွင်ႈၶဵင်ႇတႃႉၼႆႉ မၼ်းဢမ်ႇၸႂ်ႈဝႃႈ တေလႆႈဢဝ် မိူင်းထၢႆႇဝၢၼ်းၵူၺ်း တေထုၵ်ႇတိုၵ်းသိမ်းဢဝ် ပေႃးဝႃႈ မိူင်းထၢႆႇဝၢၼ်း ထုၵ်ႇတိုၵ်းသိမ်းဢဝ်ယဝ်ႉၼႆ ၶႄႇတေမီးႁႅင်း တႃႇတေၶႄႉၶဵင်ႇ ဢမႄႇရိၵၢၼ်ႇ ၼိူဝ်ၶဵင်ႇလုမ်ႈၾႃႉ ၼမ်မႃးသေ တေႁဵတ်းႁႂ်ႈ လွင်ႈၶပ်ႉၶိုင် ၸၼ်ႉလုမ်ႈၾႃႉ ဢၼ်ဢိင်ၼိူဝ် ပၵ်းပိူင်ၼၼ်ႉ လူႉလႅဝ်ၵႂႃႇ” ၼႆယဝ်ႉ။

“တီႈသုတ်းမၼ်း လွင်ႈၼႆႉ တေတုမ်ႉတိူဝ်ႉ ၽွၼ်းလီ မိူင်းၵိူတ်ႇ ဢမႄႇရိၵၢၼ်ႇ ၼင်ႇၵဝ်ႇ။ ယွၼ်ႉၼၼ် ၶႃႈမုင်ႈမွင်းဝႃႈ ၸွမ်ပွင်ၸိုင်ႈ ထရမ်ႉ တေသိုပ်ႇ ၵမ်ႉထႅမ် လွင်ႈငမ်းယဵၼ် လႄႈ လွင်ႈၼိမ်သဝ်း တီႈၼႂ်း ဢိၼ်ႇတူဝ်ႇပၸိၽိၵ်ႉ” ၼႆယဝ်ႉ။

ၵဵဝ်ႇၵပ်းလွင်ႈ လႆၢးလၢတ်ႈၼၼ်ႉ ထၢၼ်ၽွင်းလူင် ၵၢၼ်ၼွၵ်ႈမိူင်း မိူင်းၶႄႇ ဢမ်ႇတွပ်ႇၶိုၼ်းၵမ်းလဵဝ်။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ထရမ်ႉ_ထုၵ်ႇလႆႈသူးၼူဝ်ႇပႄႇလ်_ပေႃးႁႄႉႁၢမ်ႈလႆႈ_ၶႄႇ_ဢမ်ႇၸႂ်ႉဢဵၼ်ႁႅင်းတေႃႇ_မိူင်းထၢႆႇဝၢၼ်း&oldid=12377"