ထရမ်ႉဝႃႈ မႃႇတူႇရူဝ်ႇ မိူင်းဝႄႇၼေႇၸွႆးလႃး ထုၵ်ႇတီႉၺွပ်း ဝၢႆးသေ တိုၵ်းယိုဝ်း

ဝၼ်းဢႃးတိတ်ႉ၊ ၸၼ်ႇဝႃႇရီႇ 4၊ 2026 

မိူဝ်ႈဝၼ်းသဝ်ၼၼ်ႉ ဢမႄႇရိၵၢၼ်ႇ တိုၵ်းယိုဝ်း မိူင်းဝႄႇၼေႇၸွႆးလႃးသေ တိၺွပ်းလႆႈ ၸွမ်ပွင်ၸိုင်ႈ ၼိၵူဝ်ႇလႃႇ မႃႇတူႇရူဝ်ႇ ဢၼ်ယၢမ်ႈပဵၼ် ၸွမ်ပွင်ၸိုင်ႈမႃး ၶၢဝ်းႁိုင်ၼၼ်ႉသေ ၸွမ်ပွင်ၸိုင်ႈ ဢမႄႇရိၵၢၼ်ႇ တေႃႇၼႄႇထရမ်ႉ ပၼ်ၵႂၢမ်းမၼ်ႈဝႃႈ တေဢဝ်မိူင်းၼၼ်ႉ ဝႆႉတႂ်ႈ ၵုမ်းၵမ် ဢမႄႇရိၵၢၼ်ႇ တႃႇယၢမ်းလဵဝ်ၼႆသေတႃႉ ၽူႈမီးပုၼ်ႈၽွၼ်း မိူင်းဝႄႇၼေႇၸွႆးလႃးၶဝ် ပၼ်ၵႂၢမ်းမၼ်ႈဝႃႈ တေဢမ်ႇယွမ်းႁပ်ႉ ၼႆယဝ်ႉ။

ၼႂ်းၵၢၼ်ၽဵဝ်ႈမူၺ်ႉ ၶိုၼ်းလဵဝ် ဢၼ်ႁဵတ်းႁႂ်ႈ ၾႆးၾႃႉ ၼႂ်းဝဵင်း Caracas ၵမ်ႈၽွင်ႈ လႆႈလူႉလႅဝ်ၵႂႃႇၼၼ်ႉ တပ်ႉသိုၵ်းၶိုၵ်ႉတွၼ်း ဢမႄႇရိၵၢၼ်ႇၶဝ် တီႉၵမ်လႆႈ မႃႇတူႇရူဝ်ႇ ၼႂ်းႁိူၼ်းႁူမ်ႇလူမ်ႈမၼ်း ဢၼ်႞ ဢမ်ႇၼၼ် ႁိမ်းႁိူၼ်းမၼ်းၼၼ်ႉ ၼႆယဝ်ႉ။ ယွၼ်ႉပိူဝ်ႈ မႃႇတူႇရူဝ်ႇ လႆႈထုၵ်ႇ ဢမႄႇရိၵၢၼ်ႇ ၵုမ်းၶင်ဝႆႉလႄႈ မိူဝ်ႈပၢင်သပ်းၸႅင်ႈၶၢဝ်ႇ တီႈႁူင်းလိုဝ်ႈသဝ်း Mar-a-Lago တီႈ Florida ၼၼ်ႉ ထရမ်ႉ လၢတ်ႈဝႃႈ “ႁဝ်းၶႃႈ တေဢုပ်ႉပိူင်ႇ မိူင်းတေႃႇထိုင် ၶၢဝ်းယၢမ်း ဢၼ်ႁဝ်းၶႃႈ ႁဵတ်းလႆႈ လွင်ႈလႅၵ်ႈလၢႆႈ ဢၼ်လွတ်ႈၽေး၊ “ႁဝ်းၶႃႈ ဢမ်ႇၸၢင်ႈဢဝ်တိုဝ်ႉတၢင်း ဢၼ်ပိူၼ်ႈ ဢဝ်ပုၼ်ႈၽွၼ်း မိူင်းဝႄႇၼေႇၸွႆးလႃး ဢၼ်ဢမ်ႇမီး ၽွၼ်းလီ ၵူၼ်းမိူင်းဝႄႇၼေႇၸွႆးလႃး ၼႂ်းၸႂ်ၼၼ်ႉလႆႈ” ၼႆယဝ်ႉ။

မိူဝ်ႈဝၼ်းသဝ် ၵၢင်ၶမ်ႈၼၼ်ႉ ႁိူဝ်းမိၼ် ဢၼ်ပႃး မႃႇတူႇရူဝ်ႇ လႄႈ မေးမၼ်း သီႇလီႇယႃႇ ၽလေႃးရႅတ်ႉ ၼၼ်ႉ လူင်းမႃး တီႈၸႄႈမိူင်းၼိဝ်းယွၵ်ႉ ပွတ်းႁွင်ႇ ၼႆ သိုဝ်ႇၶၢဝ်ႇလၢႆလၢႆဢၼ် ဢွၵ်ႇၶၢဝ်ႇဝႆႉၼင်ႇၼႆ။ ၼႂ်းၶႅပ်းႁၢင်ႈၼၼ်ႉ လႆႈႁၼ် ႁိူဝ်းမိၼ် ဢၼ်ႁွတ်ႈၽႅဝ် တီႈၶူင်ႇႁိူဝ်းမိၼ် ၵူႈမိူင်းမိူင်း Stewart ဢၼ်မီးတီႈ ၽၢႆႇႁွင်ႇဝၼ်းတူၵ်း ဝဵင်းၼိဝ်းယွၵ်ႉ မွၵ်ႈ 60 လၵ်း (97 ၵီႇလူဝ်ႇမီႇတႃႇ) ၼၼ်ႉသေ ၵူၼ်းႁၢပ်ႇၵၢၼ် FBI ဢမႄႇရိၵၢၼ်ႇ လၢႆလၢႆၵေႃႉ လႄႈ ၶူဝ်းၼုင်ႈတၢင်းဝႆ တၢင်ႇၸိူဝ်း ၶိုၼ်ႈမႃး ဝၢႆးသေ ႁိူဝ်းမိၼ် လူင်းမႃးၼၼ်ႉယဝ်ႉ။ ၶၢဝ်ႇငၢဝ်း ထီးဝီး မိူၼ်ၼင်ႇ CNN, Fox News လႄႈ MS Now ၶဝ်တႄႉ လၢတ်ႈဝႃႈ ၵူၼ်းၵေႃႉဢၼ်လူင်းႁိူဝ်းမိၼ်ၼၼ်ႉ ပဵၼ် Maduro ၼႆယဝ်ႉ။

ထရမ်ႉ တေဝၢင်းၽႅၼ် တႃႇတေၵုမ်းၵမ် မိူင်းဝႄႇၼေႇၸွႆးလႃး ၸိူင်ႉႁိုဝ်ၼႆတႄႉ ပႆႇၸႅင်ႈလႅင်း။ တပ်ႉသိုၵ်းဢမႄႇရိၵၢၼ်ႇ ဢမ်ႇမီးဢႃႇၼႃႇ ၵုမ်းၵမ်လႆႈ မိူင်းၼၼ်ႉ ႁင်းမၼ်းသေ လူင်ပွင်ၸိုင်ႈ မႃႇတူႇရူဝ်ႇၼႆႉ မိူၼ်ၼင်ႇ တိုၵ်ႉၵုမ်းၵမ်ဝႆႉ ၵူၺ်းဢမ်ႇၵႃး ဢမ်ႇမီးၸႂ်ၶႂ်ႈႁူမ်ႈမိုဝ်းၵၼ်တင်း ဝႃႇသျိၼ်ႇတၢၼ်ႇ ၼႆယဝ်ႉ။

ၽူႈမီးပုၼ်ႈၽွၼ်း ႁွင်ႈၵၢၼ်ၽၢႆႇတတ်းသိၼ် ၵေႃႉ႞ လၢတ်ႈဝႃႈ မႃႇတူႇရူဝ်ႇ ဢၼ်ထုၵ်ႇ ဢမႄႇရိၵၢၼ်ႇ ဢဝ်တၢင်းၽိတ်း လၢႆလၢႆလွင်ႈ ပႃးၸဵမ် လွင်ႈဝၢင်းၽႅၼ် ၵေႃႇၵၢၼ်ႁၢႆႉ ယႃႈမဝ်းၵမ်ၼၼ်ႉ တေလႆႈမႃး တီႈလုမ်းတြႃး ၾႅတ်ႇၻရႄႇ ဝဵင်းမႅၼ်ႇႁႅတ်ႉတၼ်ႇ မိူဝ်ႈဝၼ်းၸၼ်ၼၼ်ႉ ၼႆယဝ်ႉ။ မေးမၼ်းၵေႃႈ လႆႈထုၵ်ႇဢဝ်တၢင်းၽိတ်း ပႃးၸဵမ် လွင်ႈဝၢင်းၽႅၼ် တေႃႉသူင်ႇယႃႈမဝ်းၵမ် ၶဝ်ႈမိူင်း။ ၽူႈမီးပုၼ်ႈၽွၼ်း ၵေႃႉၼၼ်ႉ လၢတ်ႈတီႈ သိုဝ်ႇၶၢဝ်ႇ Reuters ဝႃႈ မႃႇတူႇရူဝ်ႇ တေလႆႈၵုမ်းၶင်ဝႆႉ တီႈႁူင်းၵုမ်းၶင် ဝဵင်းလူင် ပရူဝ်ႇၵလိၼ်ႇ ၵွၼ်ႇၼႃႈ တေမႃးၶိုၼ်ႈလုမ်းတြႃး ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Reuters. "Trump says Venezuela's Maduro captured after strikes" — Reuters, January 4, 2026
• CNN. "Maduro brought to US to face charges as Trump vows to ‘run’ Venezuela and take control of oil reserves" — CNN, January 4, 2026
• JILL LAWLESS and REBECCA SANTANA. "What we know about a US strike that captured Venezuela’s Maduro and what comes next" — AP News, January 4, 2026
• Jennifer Jacobs, Joe Walsh, James LaPorta, Tucker Reals. "U.S. strikes Venezuela and captures Maduro; Trump says "we're going to run the country" for now" — CBS News, January 4, 2026
• NBC News. "Live updates: Maduro arrives in New York after capture in Venezuela" — NBC News, January 4, 2026