Jump to content

ထရမ်ႉလႄႈ ပူႇတိၼ်ႇ လႆႈၸႂ်ၵၼ် တႃႇၵိုတ်းတိုၵ်း ႁူင်းႁႅင်းၾႆးၾႃႉ တီႈပၢင်တိုၵ်း ယူႇၶရဵၼ်း

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းပုတ်ႉ၊ မၢတ်ႉၶျ် 19၊ 2025

​ထရမ်ႉ လႄႈ ပူႇတိၼ်ႇ ႁူပ်ႉထူပ်းၵၼ် (ၶႅပ်းႁၢင်ႈၵဝ်ႇ)

ၸွမ်ပွင်ၸိုင်ႈ တေႃႇၼႄႇထရမ်ႉ လႄႈ ၸွမ်ပွင်ၸိုင်ႈ ရတ်ႈသျႃး ပူႇတိၼ်ႇ လႆႈၸႂ်ၵၼ် မိူဝ်ႈဝၼ်းဢင်းၵၢၼ်းၼၼ်ႉ တႃႇတေၵိုတ်းယိုတ်း လွင်ႈတိုၵ်းတေႃး ၵၢၼ်ၵေႃႇသၢင်ႈ ႁႅင်းၾႆးၾႃႉ ၼႂ်းပၢင်တိုၵ်း ယူႇၶရဵၼ်းၼၼ်ႉ ၵမ်းလဵဝ်သေတႃႉ ၽူႈဢွၼ်ႁူဝ် ရတ်ႈသျႃး ဢမ်ႇၵမ်ႉထႅမ် လွင်ႈၵိုတ်းယိုတ်း လွင်ႈတိုၵ်းတေႃး ဢၼ်ၵႂၢင်ႈၶႂၢင်လိူဝ် တႃႇ 30 ဝၼ်း ဢၼ်လူင်ပွင်ၸိုင်ႈ ဢမႄႇရိၵၢၼ်ႇ တဵၵ်းတဵင်ဝႆႉၼၼ်ႉ။

ႁိူၼ်းၽိူၵ်ႇၵႅဝ်ႈ လၢတ်ႈဝႃႈ ပဵၼ်ၶၵ်ႉတွၼ်ႈဢွၼ်တၢင်းသုတ်း ၼႂ်း “လွင်ႈတူင်ႉၼိုင် တႃႇလွင်ႈငမ်းယဵၼ်” ဢၼ်ၶဝ်မုင်ႈမွင်းဝႃႈ တေပႃး လွင်ႈၵိုတ်းတိုၵ်း ၼိူဝ်ၼမ်ႉ တီႈပၢင်ႇလၢႆႇလမ်သေ လိုၼ်းသုတ်းမႃး တေၵိုတ်းယိုတ်းလႆႈ ပၢင်တိုၵ်း ႁႂ်ႈတဵမ်ထူၼ်ႈ လႄႈ ႁႂ်ႈမၼ်ႈၵိုမ်းၼႆယဝ်ႉ။

ၽွင်းမိူဝ်ႈၵပ်းၽူၼ်းၼၼ်ႉ ပူႇတိၼ်ႇ ၶိုၼ်းတုၵ်းယွၼ်း ႁႂ်ႈၵိုတ်းယိုတ်း လွင်ႈၸွႆႈထႅမ် ၵၢၼ်သိုၵ်း လႄႈ ၵၢၼ်ၸွပ်ႇၶၢဝ်ႇ ၼွၵ်ႈမိူင်း တီႈမိူင်းယူႇၶရဵၼ်း ၼႆ ၶရႅမ်ႇလိၼ်ႇ လၢတ်ႈၼႄၼင်ႇၼႆ။

ဝၢႆးသေ လွင်ႈၵပ်းသိုပ်ႇယဝ်ႉတူဝ်ႈၵႂႃႇ ဢမ်ႇႁိုင်သင် တီႈဝဵင်းၶိပ်ႉၼၼ်ႉ လႆႈငိၼ်းသဵင်ၾၢင်ႉ ၽေးၵၢင်ႁၢဝ် ၶဝ်ႈမႃးသေ ဝၢႆးၼၼ်ႉ ၼႂ်းဝဵင်းၼၼ်ႉ လႆႈငိၼ်းသဵင်မၢၵ်ႇတႅၵ်ႇ။ ၸဝ်ႈၼႃႈတီႈ ၼႂ်းပိုၼ်ႉတီႈၶဝ် တိုၵ်းသူၼ်းႁႂ်ႈၵူၼ်းမိူင်း ႁႃတီႈယူႇတၼ်းသဝ်း။

ၸွမ်ပွင်ၸိုင်ႈ ယူႇၶရဵၼ်း လၢတ်ႈတီႈၽူႈသိုဝ်ႇၶၢဝ်ႇၶဝ်ဝႃႈ ယူႇၶရဵၼ်းၼႆႉ ပိုတ်ႇၽုၺ်ႇပၼ် ၶေႃႈတၢင်ႇၼႄ ဢၼ်တေႁဵတ်းႁႂ်ႈ မီးလွင်ႈငမ်းယဵၼ် ဢၼ်မၼ်ႈၵိုမ်း လႄႈ ဢၼ်ၽဵင်ႇပဵင်းၼၼ်ႉယူႇ ၵူၺ်းၵႃႈ မၼ်းလၢတ်ႈဝႃႈ လွင်ႈဢုပ်ႇဢူဝ်းၼၼ်ႉ လူဝ်ႇလႆႈ မီးလွင်ႈႁူႉႁၼ် ၸႅင်ႈလႅင်း တဵမ်ထူၼ်ႈယူႇ ၼႆယဝ်ႉ။

ၸႄးလႅၼ်းသၵီး လၢတ်ႈဝႃႈ မၼ်းတိုၵ်ႉႁႃၶေႃႈမုၼ်း လွင်ႈဢၼ် ပူႇတိၼ်ႇလႄႈ ထရမ်ႉ လႆႈၸႂ်ၵၼ်ၼၼ်ႉယူႇသေတႃႉ မၼ်းဢမ်ႇယွမ်းႁပ်ႉ ၶေႃႈတုၵ်းယွၼ်း ပူႇတိၼ်ႇ ဢၼ်ဝႃႈ တႃႇၵိုတ်းယိုတ်း လွင်ႈၸွႆႈထႅမ် ၵၢၼ်သိုၵ်း လႄႈ လွင်ႈၸႅၵ်ႇၽႄ ၶေႃႈမုၼ်းၵၢၼ်ၸွပ်ႇ ပၼ် ယူႇၶရဵၼ်းၼၼ်ႉသေ ပၼ်ၾၢင်ႉဝႃႈ လွင်ႈႁဵတ်းၸိူင်ႉၼႆ တေႁဵတ်းႁႂ်ႈ ယူႇၶရဵၼ်း ဢူၼ်ႈဢွၼ်ႇၵႂႃႇၼႆယဝ်ႉ။

မိူဝ်ႈႁူဝ်လိူၼ်ၼႆႉ ၽူႈမီးပုၼ်ႈၽွၼ်း ယူႇၶရဵၼ်းၶဝ် တၢင်ႇလၢတ်ႈဝႃႈ ႁႂ်ႈၵိုတ်းတိုၵ်း ဢၼ်ႁူမ်ႇငမ်း ပၢင်ႇလၢႆႇလမ် လႄႈ လွင်ႈယိုဝ်းမၢၵ်ႇၼူၾႆး ဢၼ်ယိုဝ်းၵႆ လႄႈ ႁႂ်ႈပွႆႇပၼ် ၵူၼ်းတူၵ်းၶွၵ်ႈၶဝ် ၼႆယဝ်ႉ။

ထရမ်ႉ ယွင်ႈယေႃး လွင်ႈၶိုၼ်ႈယႂ်ႇ မိူဝ်ႈဝၼ်းဢင်းၵၢၼ်းၼၼ်ႉ ၵမ်းလဵဝ်ဝႃႈ ပဵၼ်ၶၵ်ႉတွၼ်ႈ ဢၼ်လမ်ႇလွင်ႈ တႃႇတေ ၵိုတ်းယိုတ်း ပၢင်တိုၵ်း ၼိူဝ်လိၼ် ဢၼ်ယႂ်ႇသုတ်း တီႈမိူင်းယူႇၶရဵၼ်း ဝၢႆးသိုၵ်းၵမ်ႇၽႃႇ ပွၵ်ႈၵမ်းသွင်ၼၼ်ႉၼႆယဝ်ႉ။

ထရမ်ႉ လၢတ်ႈတီႈ ၼိူဝ်သိုဝ်ႇတူင်ႇဝူင်းၵူၼ်းဝႃႈ “ႁဝ်းၶႃႈ လႆႈၸႂ်ၵၼ်ဝႃႈ တေၵိုတ်းတိုၵ်း ၵဵဝ်ႇၵပ်း ၵၢၼ်ပၼ်ႁႅင်းၾႆးၾႃႉ လႄႈ ၵၢၼ်ၵေႃႇသၢင်ႈ ၵူႈလွင်ႈလွင်ႈ ၵမ်းလဵဝ်သေ ပွင်ႇၸႂ်ၵၼ်ဝႃႈ တေႁဵတ်းသၢင်ႈ ႁႂ်ႈလႆႈ ၵိုတ်းတိုၵ်း တဵမ်ထူၼ်ႈ လႄႈ တီႈသုတ်းမၼ်း တေၵိုတ်းယိုတ်း ပၢင်တိုၵ်း ဢၼ်ႁၢႆႉၸႃႉ ၼႃႇ ၼႂ်းၵႄႈ ရတ်ႈသျႃးလႄႈ ယူႇၶရဵၼ်းၼႆႉ” ၼႆယဝ်ႉ။

ပူႇတိၼ်ႇ လၢတ်ႈတီႈ ထရမ်ႉဝႃႈ မိူဝ်ႈဝၼ်းပုတ်ႉၼၼ်ႉ ရတ်ႈသျႃးလႄႈ ယူႇၶရဵၼ်း တေလႅၵ်ႈလၢႆႈ ၵူၼ်းတူၵ်းၶွၵ်ႈသိုၵ်း ၼိုင်ႈၵမ်းလႂ် 175 ၵေႃႉၼႆသေ ရတ်ႈသျႃးၵေႃႈ တေမွပ်ႈပၼ် ယူႇၶရဵၼ်း ၸိူဝ်းပဵၼ် ၵူၼ်းသိုၵ်း ဢၼ်မၢတ်ႇၸဵပ်းႁၢဝ်ႈႁႅင်း 23 ၵေႃႉ ၼႆယဝ်ႉ။

လွင်ႈဢၼ် ထရမ်ႉ ၵိုတ်းယိုတ်း လွင်ႈတိုၵ်းတေႃးၵၼ် ဢၼ်မၵ်းမၼ်ႈဝႆႉၼၼ်ႉ ပဵၼ်ယွၼ်ႉ ထရမ်ႉ တိုၵ်ႉမုင်ႈမွင်း တႃႇတေႁႂ်ႈ ရတ်ႈသျႃး လူင်းလၢႆးမိုဝ်း ၶေႃႈတၢင်ႇၼႄ ၵိုတ်းတိုၵ်း တႃႇၶၢဝ်းတၢင်း 30 ဝၼ်း ဢၼ်ယိူင်းဢၢၼ်း တႃႇတေ ၵိုတ်းယိုတ်း လွင်ႈရတ်ႈသျႃး ၶဝ်ႈတိုၵ်း မိူင်းယူႇၶရဵၼ်းၼၼ်ႉယူႇ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ထရမ်ႉလႄႈ_ပူႇတိၼ်ႇ_လႆႈၸႂ်ၵၼ်_တႃႇၵိုတ်းတိုၵ်း_ႁူင်းႁႅင်းၾႆးၾႃႉ_တီႈပၢင်တိုၵ်း_ယူႇၶရဵၼ်း&oldid=11452"